Vitne  har  meldt  seg  etter  hærverket  i  Gata

At nokon har saga ned eitt tre i Gata har opprørt suldølen. Nå melder politiet at dei har vitne i saka.

Vitne har meldt seg etter hærverket i Gata

Det var eit trist syn som møtte naboar og forbipasserande i Gata søndag morgon.

av Nora Bogetvedt Jenssen

I løpet av natta hadde nokon saga ned eitt av pryd-trea, lengst sør i gateløpet.

Vitne meldt seg
I går, tysdag, melde GDE-leiar Siri Fisketjøn Indrebø at saka er meldt til politiet, og at vitne har meldt seg. Etterforskinga er starta, og vitne vil bli kalla inn til avhøyr i løpet av dagen eller ein av dei næraste dagane. GDE-leiaren kan ikkje seia noko om det er eitt eller fleire vitne.
– Det er viktig at publikum melder frå om dei veit noko om denne saka, oppmodar ho.

Opprørte naboar
Då Suldalsposten var i Gata søndag morgon for å ta bilde av hærverket, samla det seg fort både naboar og forbipasserande på staden. Dei var både opprørte, leie og forbanna.
Det er ikkje meir enn fire veker sidan nokon ramponerte dei offentlege toaletta ved laksestudio. Politiet har ikkje nokon mistenkte i den saka, og Fisketjøn Indrebø seier dei framleis er svært interesserte i tips om hendinga.