Suldal er spurt om å ta imot færre flyktningar enn tidlegare
Kommunen er endå ikkje blitt førespurt om busetjing av flyktningar for 2025, men på nettsida til Integrerings og mangfaldsdirektoratet (IMDI), kan ein lesa at Suldal er tiltenkt 20.
Publisert
I 2023 tok Suldal imot 90 flyktningar, og i år er talet 65. Suldal er den kommunen i Rogaland som har teke imot flest flyktningar dei siste to åra i forhold til folketalet.
Stavanger er bedt om å ta imot flest
Annonse
For 2025 er både Sauda og Hjelmeland bedne om å at imot 20 flyktningar, til liks med Suldal. For Vindafjord er talet 50, mens Stavanger er beden om å busetja 415 flyktningar, i tillegg til 20 mindreårige. For Sandnes er talet 300 og for Haugesund 150. I Rogaland er det berre Stavanger som blir spurt om å ta imot einslege mindreårige.
Imdi skriv at sjølv om det er venta ein klar nedgang i talet på flyktningar som kjem til landet, er tala likevel på eit historisk høgt nivå.
750 einslege mindreårige
Sidan 2022 har Norge teke imot over 30 000 flyktningar i gjennomsnitt kvart år, dei aller fleste frå Ukraina. I 2025 blir kommunane bedne om å busetja 18 900 flyktningar. Til neste år er det venta ein auke på 20 prosent av einslege mindreårige flyktningar. Dette er barn og ungdommar som kjem utan foreldre eller andre omsorgspersonar. Det er forventa at rundt 750 einslege mindreårige må busetjast i løpet av neste år.
