Sikra spor etter uvedkommande i Bergekrossen

Det var midt i november at det ein sein søndagskveld blei observert personar som skal ha luska i området Bergekrossen og seinare også ein bil som køyrde påfallande samt ein parkert leige-varebil der ein person med hette også stod. 

Lusking og underleg køyring, politiet ber suldølen halda auga opne

ATV og båtmotor klargjort for tjuveri

Ein observant innbyggjar tipsa politiet, ein patrulje blei sendt til området der dei påtraff sjåførane, men politiet kunne ikkje knyta bilane til noko. Politioverbetjent Eivind Asheim sa etter oppdraget til avisa at dei likevel fort trekkjer linjer til mobile vinningskriminelle og at dei ser ein del av denne type aktivitet i distriktet for tida. 

Og når Suldalsposten snakka med politiet før helga, fortel politioverbetjent Eivind Asheim at det måndagen etter den aktuelle søndagen, blei oppdaga at bedrifta Autagro i Bergkrossen hadde hatt uvedkommande inne på området. 

– Det er tatt ut ein ATV frå transportkassen og også ein båtmotor er klartgjort for tjuveri, ser det ut som. Det er også funne eit hol i gjerdet, så dette blir vurdert som forsøk på grovt tjuveri, seier Asheim. Han fortel at politiet tysdagen var på åstadsundersøking, at det er sikra spor og at dei nå er sendt til analyse med tanke på dna. 

– Me ventar på svar, men ser dette i samanheng med observasjonane natta før.