Sand skule får endeleg ny inspektør
Kommunalsjef for oppvekst, Svein Carlos Gjil, er strålande nøgd med at jakta etter ny inspektør på Sand skule endeleg er over.
Publisert
– Etter fleire utlysingar, lukkast det endeleg å få inspektør på plass, rapporterer Gjil.
Det er Ingunn Sørnes som har takka ja til stillinga, og ho er godt kjent med både kommunen og Sand skule frå før.
Annonse
Gjil seier den nye inspektøren alt har vore og helsa på personalet ved skulen, og at ho startar 1. februar.
– Spennande
Sørnes sjølv er spent på den nye arbeidsdagen som ventar på Sand. Ho er busett i Sauda, og jobbar i dag som inspektør ved ungdomsskulen der. Som nyutdanna lærar jobba ho på Sand skule, men det var før den første utbygginga.
– Då eg såg den utlyste stillinga på Sand skule, blei eg nysgjerrig på å prøva noko nytt. Eg måtte gå nokre rundar med meg sjølv. Nå har eg vore 17 år på ungdomsskulen, og eg trur det er sunt med eit byte og nye utfordringar, seier Sørnes, som spesielt gler seg til å jobba med Super-programmet på barnetrinnet, eit opplegg som siktar på det psykososiale miljøet ved skulen.
