Øyvind Halgunset er Årets vgs-lærar i nordfylket
Han blei kåra under Rogalandskonferansen tidlegare denne veka.
Publisert
Halgunset jobbar som lærar ved Sauda vgs, og er blitt nominert av ein av elevane sine på avdeling Sand (Toppvolley).
Får ros for pedagogikk og fagleg engasjement
Annonse
Eleven skildrar ein lærar som er smilande, som ser kvar enkelt elev, som er oppteken av at det er lov å gjera feil og som er fagleg engasjert. Nominasjonen kjem altså frå elevane sjølve.
Heile nominasjonen kan du lesa nederst i saka.
Traff godt på kriteria
Viss ein tek utgangspunkt i nominasjonen, treff Øyvind Halgunset svært godt på kriteria som blei sett. Dei gjekk blant anna ut på evne til å møta både klassa og den enkelte, å vera fagleg engasjert, kreativ og nytenkjande og å la elevane få vera med å forma undervisninga.
Annonse
Initiativet til utdelinga kjem frå nokon av dei tilsette på skulane i fylket. Dei ønskte å løfta fram den jobben tilsette og lærarar i fylket gjer. Dei fekk inn nominasjonar frå nesten 200 elevar.
Vart overraska over å vinna
– Dette hadde eg ikkje forventa i det heile tatt. Eg visste ikkje at prisen eksisterte. Eigentleg hadde eg ikkje tenkt meg på konferanse, men rektor var ganske oppteken av at eg skulle dra. Det forstår eg litt betre nå, seier Halgunset til avisa.
Erfjordbuen skildrar seg sjølv som lektor av den gamle skulen.
– Eg synest ikkje sjølv at eg er nokon spektakulær lærar. Eg er opptatt av relasjonen mellom meg og elevane, og at det er eit godt samspel mellom dei og meg.
Delar prisen sin med elevar og tilsette
Annonse
Han rosar elevane sine og meiner at det er fleire enn han, som fortener prisen.
– Me snakkar mykje om laget rundt eleven. Her på Toppvolley er det litt ekstra spesielt sidan elevane bur på Rygjatun og ikkje får komma heim til familien kvar dag. Dei tilsette der er også utruleg flinke til å følgja opp elevane. Prisen kunne ha godt til heile skulen, me drar lasset saman.
Kombinerer natur-interessa med å skapa gode relasjonar
Halgunset har studert biologi og etter kvart pedagogikk og underviser i matte, kjemi og naturfag.
– Eg er opptatt av å ta vare på naturen. Det gjer det ekstra meiningsfullt for meg å undervisa realfaga, seier han.
Yrkesvalet er på ingen måte tilfeldig, og Halgunset syntest allereie som pedagogikkstudent at læraryrket er heilt spesielt.
Annonse
– Eg tenkjer at det er den mest meiningsfulle jobben ein kan ha. Det tenkte eg då eg studerte, og det tenkjer eg i dag også.
Kvardagen er best
– Kva er det beste med å undervisa?
– Det er den daglege kontakten med elevane – dei heilt vanleg timane, seier Halgunset som heiar på kvardagane.
Han trivst nemleg utruleg godt i klasserommet saman med elevane.
– Eg sett relasjon utruleg høgt. For meg kjennest det ut som at me jobbar i lag og ikkje mot kvarandre. Me løyser det meste med å snakka saman. Og så pleier eg å minna elevane mine på at eg også berre er eit menneske som også treng hjelp frå dei for at undervisninga skal bli god. Det skjønar dei også.
