Norske juletreprodusentar hogg laus på plasttre
Fleire og fleire nordmenn vel juletre i plast. Nå vil produsentane av ekte juletre ta opp konkurransen og marknadsføra seg betre.
– Me har vore veldig gode på å dyrka fram fine juletre. Men me har ikkje vore like flinke til å marknadsføra produktet vårt. Me har innsett at me må selja oss på ein annan måte, nå som plasttrea har vorte så populære, seier Lena Nergård til Nationen.
– Plastikk-konstruksjon
Annonse
Ho er juletrebonde og konstituert dagleg leiar i Norsk juletreservice, eit produsenteigd selskap som sel ekte juletre frå norske produsentar.
Heile 60 prosent av nordmenn har uekte tre, medan berre 30 prosent skal ha ekte tre, viser juleundersøkinga som vart gjennomført av betalings- og shoppingløysinga Klarna for eit par år sidan.
– Me har kanskje noko å læra av dei som sel plasttre når det gjeld marknadsføring, seier Nergård, før ho bryt ut:
– Eg vil eigentleg ikkje kalle det «tre», det er heller ein plastikkontruksjon!
Annonse
Nergård fortel at dei i år vil utstyra alle tre med eit grønt kort, med informasjon om korleis treet blir produsert og kva det betyr for miljøet. Her får du også ulempene ved å velja plast. Kampanjen er eit prosjekt i regi av Norsk Gartnerforbund.
(©NPK)
