Kortare ventetid og lågt sjukefråvær i Helse Fonna

Månadsrapporten for oktober viser at det innan somatikk var 59 dagars ventetid, psykisk helsevern vaksne 37 dagar, psykisk helsevern barn og unge 28 dagar og rusbehandling 19 dagar, for dei som ventar på behandling.

Under kravet

Tala viser, ifølgje pressemeldinga, at helseføretaket er under kravet innan psykisk helsevern, mens ventetida innan somatikk nærmar seg målkravet. Samanliknar ein talet på fristbrot innan psykisk helsevern i 2022 med dagens tal, er dei redusert med heile 64 prosent.

Talet på tilsette aukar gradvis, og rapporten viser at Helse Fonna har 4 311 tilsette. Det er 120 fleire enn for to år sidan. Det har det siste året vore fokus på å få fleire inn i heiltidsstillingar. I dag har om lag to av tre av dei fast tilsette heiltidsstilling.

Lågt sjukefråvær

Talet på utskrivingsklare pasientar er framleis høgt, men her er det god dialog med kommunane, og statistikken viser ein gledeleg og vesentleg nedgang siste månaden, ifølgje Helse Fonna.

Sjukefråværet er framleis svært lågt. Føretaket har nå det lågaste sjukefråværet på fleire år, og tala syner at det er størst nedgang på legemeldt sjukefråvær. Sjukefråværet i Helse Fonna var i oktober på 7,1 prosent. Det er godt under gjennomsnittet i Helse Vest RHF, og Helse Fonna er det føretaket som har lågast sjukefråvær.