Tilsvar til debatt om Ryfylkemuseet

I Suldalsposten vert det referert til formannskapsmøtet der budsjettforslaget for 2025 var tema.

Formannskapets budsjettseminar: Mindre delfiakake, meir grovbrød

Legg opp til ytterlegare kutt

Kommunedirektøren kommenterte kuttforslaget i driftstilskotet til Ryfylkemuseet og nemnde at forslaget inneber eit kutt på 100 000 kroner i 2025. Dette stemmer, men det er viktig å påpeike at budsjettforslaget legg opp til ytterlegare kutt fram til 2028, slik at samla kutt ligg betydeleg høgare.

Mista kjøpekraft for 200 000 kroner

Ryfylkemuseet har i mange år hatt eit nært og godt samarbeid med Suldal kommune, noko me set stor pris på. Kommunen har vore ein viktig støttespelar, men diverre ser me ein gradvis nedgang i driftstilskotet. Driftstilskotet har stått uendra på 1 547 000 kroner sidan 2022. Når me tek omsyn til prisstigninga frå januar 2022 til oktober 2024, som har vore 14,2 prosent, har tilskotet mista over 200 000 kroner i kjøpekraft. Dette skapar store utfordringar.

Har alt redusert i tilbod

Me er svært uroa over at kommunen ikkje berre har valt å la vere å kompensere for løns- og prisstigning, men òg foreslår ein ytterlegare reduksjon i tilskotet dei neste fire åra. Allereie i år har me måtta redusere enkelte tilbod, samstundes som me har arbeidd hardt for å halde oppe aktivitetane for barn og unge, i tillegg til kulturminnevernarbeidet.

Råkar aktivitet for barn og unge

Dei føreslåtte kutta vil likevel føre til ei vesentleg reduksjon i våre sentrale tilbod. Dette vil spesielt råke aktivitetar retta mot barn og unge, som har vore ein hjørnestein i museet sitt arbeid. Konsekvensane inkluderer mellom anna bortfall av ferieaktivitetar, redusert tilrettelegging for skular og barnehagar, redusert vedlikehald av museet sine bygningar, samt svekt samarbeid med frivillige og regionale aktørar. I tillegg vil museet si rolle som ein identitetsskapande institusjon i Suldal bli betydeleg svekt.

Uforståeleg

Me registrerer òg kommunedirektøren sin kommentar om at museet ikkje skal ha rapportert om aktivitetar for barn og unge dei siste åra. Dette er for oss uforståeleg. Museet leverer kvart år ein årsrapport som vert sendt til kommunen. Vidare rapporterer me tal og statistikk til Kulturdirektoratet, noko me gjerne gjer tilgjengeleg for kommunen om det er ynskjeleg. Dersom kommunen har innført nye krav til rapportering, er me sjølvsagt opne for å oppfylle desse, men då må me få vite kva som vert forventa.

Inviterer til dialog

Me ønskjer difor å invitere kommunedirektøren til ein dialog for å avklare korleis rapporteringa kan strukturerast framover for å møte kommunen sine behov. Me ser fram til eit konstruktivt samarbeid om dette og håpar på ei god løysing som sikrar Ryfylkemuseet si framtidige rolle og arbeid i lokalsamfunnet.

Anna Ehrhardt, direktør Ryfylkemuseet