Jordskred på riksveg 13 ved Hylstunnelen
Det var i går kveld at det gjekk jordskred ved Hylsåa, like nordaust for Hylstunnelen, mellom Suldalsosen og Nesflaten. Vegen blei stengt og er det framleis, måndag morgon, og også ved Lono er det meldt om ras.
Publisert
Sist oppdatert
Oppdatert kl. 11. 23. Vegen er framleis stengt, men vegtrafikksentralen opplyser at naudetatar nå kan passera.
Måndag morgon, klokka 05.53, seier operatøren hjå Vegtrafikksentralen at ein vil trengja nokre timar med dagslys for å vurdera og evt. rydda vegen, og at folk må belaga seg på at vegen vil vera stengt i føremiddag.
Annonse
Jordraset ved Hylstunnelen
– Me treng dagslys for å vurdera raset, det handlar om tryggleiken til dei som skal rydda. Det er framleis sterk vind, men nå går det over til meir bygevêr så vêret går i meir riktig retning. Men det tar tid, og me kan ikkje seia konkret når vegen vil bli opna. Dette er det lokale folk som skal vurdera, seier operatøren nå rett før klokka 06 måndag morgon.
Jordras som gjekk aust for Hylstunnelen er tre meter breitt og tre meter høgt og sperrar vegen. Brøytemannskap på staden har meldt om at det ikkje skal vera bilar i raset, og det er ikkje mogleg å passera raset. Operatøren ved vegtrafikksentralen oppmodar publikum om å følgja med på trafikkmeldingane på 175 for informasjon om når vegen opnar.
Ras ved Lono
Annonse
Også ved Lono har det gått ras på riksveg 13, og raset skal sperra den eine sida av vegen, melde Hardanger Folkeblad i går kveld. Tipsar fortel til avisa at det er svært mykje vatn i vegbanen heile vegen mellom Røldal og Nesflaten. Steinraset har gått same staden der det har gått eit større snøskred tidlegare.
