Under overflata

Leiar:

Om ei knapp veke skal dei folkevalde i kommunestyret igjen sitja julemiddagpynta og vedta budsjettet.

Det kan fort bli like varmt rundt øyrene som under formannskapets forhandlingar på Gullingen. Struktur er eit kjøleg ord, men når det dukkar opp i politiske debatten i Suldal, er det garantert fyr og flammar. Det handlar om grendene, om skulane, barnehagane og om tenestetilboda der.

Det handlar om måten Suldal er skrudd saman på; ein heilskap beståande av krinsar som har sine særpreg, kulturar og sine tradisjonar. Det handlar om rettferd, om reiseveg, men det handlar også om økonomi, prioriteringar og  om kvalitet. Det bør i alle fall også handla om dei tre sistnemnde.

Men den debatten viser seg å vera vanskeleg å ta med tru på at ulike standpunkt alle kan kvila på gode intensjonar, sjølv om dei landar på ulike konklusjonar.

Det viste debatten i formannskapet godt. Der prøvde Svanhild Løge Skålheim (KrF) å dra opp eit overordna perspektiv på det ho synest er ein vanskeleg debatten om struktur-temaet, det seier litt om opplevinga, når vanskelege samtalar mellom par er gangbare som samanlikning.   Kari Vaage Gjuvsland (Ap) var den einaste som melde seg på erkjenninga av at debatten om strukturen på oppvekst og omsorg er ein nødvendig debatt å ta, ikkje berre av økonomiske, men også av sosiale og faglege grunnar. Med dagens sviktande inntekter, er dette nettopp den type debattar folkevalde i Suldal må tåla å få trening i.

Det paradoksale er at verken Skålheim eller Vaage Gjuvsland har føreslått ein einaste skulesamanslåing i budsjettet. Det dei to, med støtte frå Rainer Speth (H), stemte for var ei nedtrapping av drifta på Jelsa bu -og omsorgssenter og å slå saman barnehagen og skulen på Ropeidhalvøya.

Når Senterpartiet i debatten vil ha det til at dei to er sugne på å skru av lyset i grendene, er det same Senterpartiet ganske så stille om det faktum at det i rådmannens forslag ligg eit punkt som gir administrasjonen mandat til å vurdera framtida til ungdomsskulen på Nesflaten. Eit forslag som går stille som eit stealth-skip under radaren, men som heile formannskapet gav si tilslutning til. Det er også ein del av biletet, om det aldri så mykje kom til å bli liggjande under overflata.