To suldøler til fylkeskamp i friidrett

13-åringane Espen Skålheim og Marie Marvik Hølland frå Sand er tatt ut til Lerøy-leikene. I helga er dei ein del av rogalandstroppen som skal konkurrera mot jamaldringar frå andre fylke.

Laget frå Rogaland Friidrettskrets skal konkurrera mot dei beste 13- og 14-åringane i Sogn og Fjordane, Hordaland, Vest-Agder og Aust-Agder. Leikane er i år 50 år, der det er tre landsdelsleikar denne helga. Første gongen leikane vart arrangerte var i 1968, då heitte dei Donald Duck-leikane. Avisa tok ein prat med dei i veka, nokre dagar før avreise.

Uttak
Tidlegare i år har begge oppnådd gode friidrettsresultat, og har håpt og trudd at dei med det var gode nok til å bli tatt ut til fylkestroppen. Det er dei, og nå er dei to av dei 45 deltakarar som reiser til Osterøy der årets leikar blir arrangert. Espen er tatt ut til å delta på 200 meter, 60 meter, kule og lengde. Marie skal konkurrera i 200 meter hekk, 60 meter hekk, høgde og lengde. Det er ikkje slik at ein kan velja sjølv. Espen vedgår at han ikkje er heilt klar til lengde.
– Kule går heilt greitt, men eg er elendig på lengde. Eg får ta det med eit smil og hoppa.

Terpa litt
Når avisa pratar med dei to unge på friidrettsbanen på Eide, er det heldigvis nokre dagar til avreise, så dei har ennå tid til å øva og finpussa på teknikkane. Marie lovar å visa nokre triks med å stemma skikkeleg, det vil seia få eit kraftig nok fråspark frå planken.
– Fart og kraft, gliser Espen, som forklarer at han kan bli litt gira, kanskje ikkje det rette når det fort kan resultera i overtramp. Marie, som kjenner seg litt ute av trening når det gjeld høgde, meiner ho må repetera og trena litt ekstra på tilløp.

Sosialt også
Dei gler seg begge til å dra på leikane. Jo høgare oppe på resultatlista, jo fleire poeng til laget. Å konkurrera blir fint, men også å ha det kjekt i lag alle saman er også ein stor del av leikane. Begge to er venner med fleire av konkurrentane frå fylket.
– Ja, ja, me chattar med dei ofte, seie Marie. Espen nikkar. Han fortel at det også kan bli sendt ei lita oppdatering på ny pers til ein kompis og konkurrent, gjerne med ein film i tillegg.

Gjerne Gjert
At mange nye og unge norske friidrettsutøvarar hevdar seg internasjonalt, tykkjer det er kjekt, som Karsten Warholm og Ingebrigtsen-brødrene. Og dei likar å sjå fjernsynprogrammet om korleis Sandnes-familien har det i kvardagen. Kunne dei tenkt seg Gjert, far til Jakob, Philip og Henrik, som trenar?
Espen er heilt sikkert i sitt svar. Han nikkar og smiler.
– Ja, å bli piska hadde jo vore litt nice.