Suldalsjegerar skal samla skrantesjukeprøvar

Nær 700 prøvetakingspakkar blir nå delte ut til jegerar som skal jakta på villrein, hjort eller elg i Suldal.

Det er Miljødirektoratet som har pålagt alle hjortevilt-jegerar å delta i kartleggingsarbei- det. Alle reinsdyrjegerar i landets 23 villreinområde er med, og jegerar i utvalde kommunar når det gjeld prøvetaking på elg og hjort. Med andre ord ein stor dugnad for å finna meir ut om den dødelege dyresjukdommen og om den har spreidd seg.

To tilfeller
Våren for to år sidan, vart det påvist skrantesjuke på villrein i Nordfjella villreinområde, som første sjukdomstilfelle i Europa. Funnet gjorde at ein tok ei drastisk avgjerd om å slakta ned heile villreinstammen på Nordfjella. 19 skrantesjukeprøvar frå denne stammen har vore positive. Det er også gjort funn av ei anna type skrantesjuke i Norge, såkalla atypisk skrantesjuke som ein trur har oppstått spontant. Den er påvist hjå tre elg i Trønde- lag og ein hjort i Møre og Romsdal.

Hjerne og lymfer
– Det er tilfeldig at Suldal er valt ut til også å ta prøvar på elg og hjort. Det fortel Turi Ottersland Tjøstheim i Suldal kommune. Ho fortel om godt oppmøte på eit informasjonsmøte i sist veke.
– Klart dette fører til litt meir arbeid for jegerane, men dei uttrykte at dei var klare for å gjera jobben.
Det som skal gjerast etter at dyret er felt, er å ta ein hjerneprøve og to lymfeknutar frå kjevepartiet på dyret. Opphoping av prionprotein i hjernen er ein indikasjon på at dyret har sjukdommen. Ein kan også påvisa sjukdommen i eit tidleg stadium med prionportein i lymfeknutane.

Haldast kjølig
Pakken alle får utdelt inneheld brukarrettleiing og utstyr til operasjonen som ho tippar dei fleste vil bruka eit kvarter på å utføra, merkelappar og konvolutt til å senda det til Veterinærinstituttet der dei analyserer prøvane.
– Etter ein har tatt prøve og ein er kommen heim, bør prøven oppbevarast i kjøleskap inntil ein sender den i posten, helst så raskt som mogleg, legg ho til. Pakken er ferdigfrankert som ekspresspakke, og analysesvaret skal vera klart etter nokre dagar.

Registera på nett
– På nettsida settogskutt.no registrerer jegerane det felte dyret og prøva. Ottersland Tjøstheim viser nettsida. Prøvesvar frå heile landet, på elg, hjort, villrein og rådyr også teke av fallvilt (påkøyrde eller daude dyr i naturen), finn ein på hjorteviltregisteret.no. Desse to nettstadene er kopla opp mot kvarandre. Totalt er det 30 000 prøvar som skal samlast inn i år. Det er elg og hjort som er to år eller eldre ein skal ta prøvar av. Når det gjeld villrein, skal dyret vera eitt år eller eldre.
Villreinjakta er alt i gang. 20. august var første jaktdag. Ottersland Tjøstheim er også interessert i opplysningar om dyr som har unormal oppførsel.
– Ser ein dyr som, til dømes, er krumbøygde, siklar og ikkje lar seg skremma, vil me gjerne vita om det.