Suldal bad på sporet igjen

Leiar:

Det er kjipt og dumt at Suldal Bad-prosjektet begynner med å flyta rett på eit skjer av ein kommafeil til nesten tre millionar kroner. Men det er verken nokon katastrofe eller noko omen om at badet nå er brennmerkt på si ferd eller at alle dei verste spådommar om økonomisk ruin og skral drift vil slå til.

Det går sjølvsagt an å ergra seg kraftig over at ein angiveleg openberr feil ikkje er blitt oppdaga på eit tidlegare tidspunkt, men kommunen gjer rett i få Suldal bad på skinner igjen, istadenfor å risikera ei utsetjing på prosjektet i ei jakt på å få rett. Nå ligg det an til oppstart på Eide i september, og det er bra.

Dei siste vekers ferievêr i Suldal og i regionen rundt er ein fuktig påminnar om at badeanlegget vil bli eit kjærkomment alternativ til aktivitet og moro for både fastbuande og feriegjester, samt gode naboar rundt oss.

Etter dei siste års skandaløse overskridingar på kommunale prosjekt, er det forståeleg at rådmann Øyvid Valen er pinleg nøyaktig med å informera og å sørgja for å peika på kuttstader som gjer at prosjektet kan starta opp innanfor den politisk vedtatte ramma.

Ikkje overraskande brukte fleire av dei folkevalde anledninga til å markera sine kjensler for og mot prosjektet då rådmannen informerte kommunestyret før ferieavslutninga. Det er vel høgst menneskeleg, men det bidrar ikkje akkurat til kvalitetssikring for det alt vedtatte prosjektet.

Dei økonomiske rammene må vera vasstette, men det er forstemmande å sjå den utandørs kulpen som arkitektane har planlagt, bli utpeikt som eliminerbar når ein ørliten del av prosjektet skal gjerast opp. Attraktivitet er og forblir eit nøkkelord for Suldal bad, og då er det forstemmande at noko av det som så openbert gjer prosjektet ekstraordinært så lett ser ut til å kunna bli barbert vekk. Ein prosaisk feil kan ikkje innta arkitektens rolle i ei slik investering.

Det må vera mogleg å finna ein million og tre som er mindre synlege, og både politikarar og administrasjon må ta mål av seg til å gå for eit Suldal bad som har vaska seg. Det vil bli behov for strategiske ordskifte om badet framover og dei må få sleppa å bli førte i omkampens tonefall.