– Skaper samhald og kameratskap

Årets juleblom:

– Skaper samhald og kameratskap

For to og eit halvt år sidan fekk Tone Mari og Øyvind Sand spørsmål frå introtenesta om å samla innvandrarar og bygdefolk til bowling eit par timar på onsdagskvelden. Det gjorde dei,og nå har det i over to år vore tilbod om ein meiningsfull fritidsaktivitet i kjellaren på Kulturhuset.

av Nora Bogetvedt Jenssen

– Nå er eg ganske overraska, trudde aldri at me skulle få juleblomen for det me gjer, men det seier sikkert alle som får den, seier ei glad Tone Mari og ler, og ektemannen Øyvind nikkar seg samd.
– Tenkte ikkje at bowlinga kvalifiserte til dette, me har det jo så kjekt sjølv, supplerer han.

Onsdag etter onsdag i over to år har dei stått på og samla fleire titals innvandrarar. Ortodokse kristne, muslimar og katolikkar, alle har det utruleg kjekt i lag, heiar på og set pris på kvarandre. Tone Mari står på og ordnar med kaffi og servering, pluss at ho er rasande flink i bowling. Det er Øyvind også, og han har lært opp dei fleste nå til å bli svært gode på bowlingbanen, er noko av det som står i nominasjonen.

Nå har all treninga resultert i at Ryfylke Bowlingklubb er gjenoppliva, så utanom trening på onsdagskveldane, er det turneringar andre dagar i veka.
– Me har det veldig triveleg. Eg kjenner jo bowlinghallen frå då eg jobba på Kulturhuset, så me klarer oss sjølv, fortel Øyvind.

Det er så utruleg fint å vera der, å merka samhaldet og kameratskapen som er, og å sjå kor glade våre nye landsmenn er for denne arenaen. Eg ønskjer verkeleg at ekteparet
Sand skal få blomen i år. Dei fortener det!