Lunsj rundt bordet i Bekkjadalen. Frå venstre Lars Fisketjøn, Nils Fisketjøn, Kjel Arne Havrevoll og Dag Fisketjøn. Til saman har dei fire på kjøkenet over 80 års arbeidserfaring.

Ola Fisketjøn AS: Liten og lokal, og med lang fartstid i faget

Familiebedrifta på Suldalsosen har halde hjula i gang i over 60 år.

Det er måndag føremiddag. Dag Fisketjøn sit ved datamaskinen på kjøkenet heime i Bekkjadalen. Frå der styrer han entreprenørbedrifta, ein jobb han har hatt i seksten år.

– Ein kan saktens feira 50 eller 60 år, men det er viktigare å bli 61. 41-åringen er meir opptatt av å tenkja framover, enn å kvila på laurbæra.

Artikkelen held fram under annonsen.

Tre brør

Akkurat denne dagen avisa er på besøk, ville faren fylt 82 år. Ola Fisketjøn døydde brått i 2009. Frå då av har brørne Lars, Nils og Dag, saman med mor Solveig som styreleiar, drive firmaet. Dei fire eig kvar sin kvart av selskapet, som i fjor omsette for rundt fire millionar kroner. Men alt fleire år før, i 2002, hadde det blitt gjort eit generasjonsskifte og avklaring om drift. Då vart dei aksjeselskap og valde å behalda firmanamnet slik det var, men med eit as bak.

Sement frå Sand til Nesflaten

Det heile starta i 1957 med ei hustomt på Hagane. Så kom RSK-utbygginga, og firmaet fekk anbodet og arbeidet med å frakta sement frå Sand til Nesflaten.

– Det var sekker med sement som vart henta frå båt ved Hydrokaien, så køyrde me oppover dalen og vidare med ferja på Suldalsvatnet. I dei tider ingen liten tur. Fleire tiår med kraftutbygging i kommunen har vore viktig for firmaet.

– På det meste var me femten tilsette. Det var under Ulla-Førre-utbygginga, fortel Dag.

Opp og ned

Rundt hundreårskiftet var det verre. Omsetnaden var god, men resultatet på botnlinja ikkje likeins.

– Då var det tøffe tider, men me har halde ut.

Den blide leiaren verkar å ikkje vera nokon pessimist, eller ein som gir seg i første runde.

– Me vil ikkje bli større. Me klarer oss akkurat.

Artikkelen held fram under annonsen.

På nettsida til firmaet ligg ei mengd med eldre bilde tatt ute på arbeid. Eit bildearkiv som viser utviklinga i bransjen.

– Heilt frå eg var liten fekk eg med meg og forstod dette på far, at det anten glapp eller at han fekk jobben.

– Ein løyen måte å leva på, jo.

Og med ordre-reservere som ikkje finst, ville nok mange ha valt noko anna for ikkje å mista nattesvevnen, men han søv godt.

– Det er svinløye.

Fleksible

Nå tar dei på seg oppdrag rundt om i kommunen, som brøyting på roden Kvilldal- Saurdal vinterstid. Når det vårast i heia, skal dei til med graving av hyttetomter. Denne dagen er det grunnarbeidet for ein garasje som står på agendaen. Ofte kan eit oppdrag som er tenkt å vara nokre veker, veksa til å bli ei jobboppdrag i fleire månadar. Det gjeld å vera fleksibel, kunna snu seg rundt når kundar spør.

– Å vera både brør og kollegaer går godt, men det er lov ta ein diskusjon eller to, forklarer Dag.

Ola Fisketjøn AS: Kjell Arne Havrevoll i gravemaskinen flytter steinmasse over frå dumparen til garasjeveggen. Lars Fisketjøn til venstre.

Godt arbeidslag

– Klart me kan vera ueinige me tre, og det er jo noko anna når ein både arbeidar og er i familie. Ei arbeidsfordeling er det: Nils og Lars er dei som tar seg av synfaring og anbod ute i feltet, medan Dag reknar og gir tilbod. Nils er den som tar seg av sprenging. Fjerde mann i arbeidslaget er Kjell Arne Havrevoll.

Artikkelen held fram under annonsen.

Eit godt arbeidslag i eittradisjonelt entreprenørselskap, med mellom anna transport, graving, brøyting, boring og sprenging. Og arbeidsveker som kan variera stort.

Tillit

For Dag er ikkje monumentaleverk signert firmaet det som betyr mest. Det er kundekontakten. I det kunden kontaktar og vil ha noko gjort. Tiltrua dei viser.

– Det er jysla kjekt det. Kva det betyr for folk, og at me får tillit til å gjera det. Dei har tiltru på at me kan levera og gjera jobben. Då har det lite å seia om det er noko stort eller smått. Det kan vera ei tomt som skal gravast, eller nokre tonn med stein som skal tippast.

Ein kan saktens feira 50 eller 60 år, men det er viktigare å bli 61.

Lunsjtid

Det singlar i grusen utanfor kjøkenglaset.Klokka har runda elleve. Tre firmabilar parkerer og inn stig dei tre utearbeidande arbeidskarane. Dennedagenhardeijobb i bygda, og då brukar dei å samlast til lunsj hjå Dag.

Ein legg osteskive rpå ei tfat og set det inni mikrobølgjeomnen, ein anna finn pålegg og brød og smørjer seg lunsj. På kjøkkenet blir det oppdatering på kva som er gjort, og kva som skal gjerast. Ein halvtime går fort. Så er det på an igjen.

– Det er å putla på slik me alltid har gjort, kjem det får ein av karane.

Ola Fisketjøn as

Maskinentreprenørfirma

Etablert i 1957

Fire fast tilsette

Omsetjing i 2017: cirka 4 millionar kroner

1965: Ola Fisketjøn på brøyteoppdrag i Bratlandsdalen. Pleddet i fanget var dåtidas HMS. Foto: Privat
Frå sementtransporten tidleg 60-talet. Her i Solheimsvik med både sement og stål som skal til Nesflaten. Foto:Privat
1962 Michigan - Bratlandsdalen.