Service i butikk

Leiar:

Det er berre å bøya seg i støvet. Det er inga lita bedrift dei har oppnådd, butikk-laget på Suldalsosen, som har tatt heim ein siger både dei og resten av Suldal kan sola seg i glansen av. 442 butikkar spreidde over by og bygd er med i konkurransen, men det er den tradisjonsrike familiebedrifta der du finn både kraftfôr og sushi som gjekk av med sigeren.

Alle veit at bygda treng butikkar til meir enn å handla i. Det har vinnarbutikken for lengst tatt konsekvensen av. Kaffikroken inne har for lengst etablert seg som ein viktig og varm møtestad for alle generasjonar, frå dei minste med isen til ungdommane med brusen og dei eldre med kaffien, og nå har butikken utvida med veranda for kundane sine.

I rettferds namn, gjaldt det kaffikrok og kjeks på fat, kunne mange bygdebutikkar stikke av med sigeren. Løyndommen til vinnarbutikken på Suldalsosen er samansett av fleire element, men det som går som den raude tråden er ei usedvanleg sterk orientering mot kunden. Anten det er kaffikroken, rask og velvillig hjelp av alskens slag, eller det er lydhøyr innstilling til ønske og oppfordringar. Heile butikken åndar av at den blir passa på; anten det er smilet i døra eller det er ein stadig nyluka og superfrisk grønsakdisk. Her kan du diskutera grønsaker og krydderkombinasjonar, her får du tips om sist ankomne råvarer med eit smil og utan kjøpepress. Her er det tålmod nok i kassa til at dei yngste kan få komma med laurdagssnop-pengane og sjølv prøva å få pengane til å strekkja rundt det dei vil ha, og her er butikkmannskapet snare til å bera posar ut til bilar eller pakkar gjerne inn blomane kundane har sendt gjennom kassa.

Det handlar om service. Eit ord som gjerne svevar over vatna i festtalar og som ikkje alltid så lett lar seg forankra på jorda, eller i butikkgolvet. Men me kjenner det igjen når me opplever det, og nettopp service er nok den sterkaste ingrediensen i butikk-sigeren.

For midt i at familien som driv Joker-butikken, kjenner sine sambygdingar, og sjølve er godt planta med seg og sine i nærmiljøet dei driv butikk i, lar dei seg aldri freista til å bli tilbakelente på servicen dei gir til sambygdingar, hyttefolk og  andre som kjem for å handla. Her er du god kunde, anten du kjem i kjeledress frå nabogarden eller i perler frå byen.
Er det rart det blir butikk av sånt?

Til lukke med kåringa, Joker Suldalsosen!