Såpeglatt på Jelsavegen

Såpeglatt på Jelsavegen

av Esther Moe

Vegane er svært glatte nå i morgontimane, og særleg har det hagla inn med klager på vegen frå Tysingvatn til Berakvam og Norsk Stein. Hjå vegmeldingssentralen fortel operatøren nå i dag tidleg at det har komme veldig mange meldingar om svært glatt veg der og at folk slit med å komma seg fram. Han fortel at Statens vegvesen fleire gonger har vore i kontakt med entreprenøren for vegvedlikehaldet, men at det også er svært krevjande forhold når regn frys til is i vegbanen. Han ber folk ta det ytterst med ro.

Bil på taket
Arbeidarar ved Norsk Stein har vore i kontakt med avisa, og dei fortel om såpeglatt føre og ein veg dei meiner umuleg kan vera salta. Fleire større bilar er observerte i vegkanten, der dei har parkert og ventar på saltbilen. Ein bil hamna på taket like før tunnelen ved Israelsneset, føraren skal ha komme uskadd frå hendinga.
Like etterpå hamna ein bil i grøfta på andre sida av tunnelen og vegfarande på staden fortel at det frå Høyvik står bilar i kryss og krakje på glatta.
Då avisa var i kontakt med politiets operasjonssentral i dag, hadde dei ikkje høyrt om problema på vegen.

VEGTRAFIKKSENTRALEN:
– Ekstremt
Vegtrafikksentralen seier midt i dagen i dag, måndag, at dei har fått bekrefta at entreprenøren har vore ute og arbeidd med glatta sidan klokka 04.00 i dag tidleg. – Men denne vêrtypen og føreforholda er på grensa til ekstremt, seier vakthavande, som meiner føreforholda med underkjølt regn blir så glatt, at bilen nesten berre burde stått.