Reisemål Suldal 

Leiar:

Det skortar ikkje på kommunar som med rette kan slå seg på brystet og meina seg kvalifisert som eit ypparleg reisemål. Suldal er ei sterk destinasjons-vare. Kommunen har investert i ein vertskapsfunksjon som er sagt å vera blant dei beste i Ryfylke, me har naturgitte udiskutable kvalitetar, driftige næringsdrivande og me har variasjon. Vegen frå snøen til stranda er kort, på ein sommardag kan ein lett få med seg både høgfjell med brøytekantar og blide bølgjer innover stranda.

Alt ligg til rette for å kunna hausta av og vidareutvikla eit fantastisk potensiale, men det krev arbeid, visjon, leiarskap og koordinering.

Hittil har den tydelegaste debatten om reiseliv i Suldal handla om bubilar og så langt har først og fremst plasseringa vore ei heit potet. Det er også eit viktig spørsmål, viss ikkje Suldal skulle få til gode bubil-plassar, kven skulle då?

Nå kastar Suldal Næringsforening og leiar Olav Lindseth seg inn i debatten. Han og foreninga meiner det er på høg tid at Suldal kommune og næringslivet får meir ut av dei flyttbare sommarbustadene som står og nyt utsikta og den friske lufta. Lindseth ser føre seg eit samarbeid der, til dømes, nærbutikkane i grendene får ansvaret for faktureringa av overnattingar og at dei gir litt av inntektene vidare til kommunen som så kan pløya det inn i turismeutviklinga. Næringsforeninga er også overbevist om at ordninga vil føra til meirsal i kontakten mellom nærbutikk og bubilturistane. Tilnærminga er god; tradisjonen for å tenkja inntektsside i dette er ikkje spesielt sterk. Det er neppe mange turistar som forventar at overnattingar med utsikter som den på kaiane på Nesflaten eller Sand er heilt gratis.

Ein prislapp er også ei bevisstgjering av verdien, noko som heller ikkje treng å skada.

Det gjenstår sjølvsagt ei rekkje spørsmål om korleis, kven, kor hen, det er openbert ikkje mogleg å avgiftsbeleggja kvar einaste rasteplass og lomme langs vegane.
Reiselivet er eitt av dei felta der utviklingspotensialet er stort og, som Suldal Vekst-leiar Laila Steine nyleg sa om næringslivet generelt, det handlar om vidareforedling. Å ikkje selja eller gi vekk alt rundt, men å filetera det me har, anten det er kraft eller natur og å sørgja for at verdien av det me har og skaper, blir liggjande igjen her.