Norgesmeisteren blir kåra på påskeaftan
Er du sugen på ein NM-tittel, eller berre ute etter litt fart og spenning, er Gata på Sand plassen, påskeaftan. – Dette blir løye!, slår sentrumsleiar Konrad Jårvik fast, etter at UFO-akebretta er testa ut på snøføret i Sandsbrauta.
UFO-aking
Sandsgruppa riggar for påskemoro. Laurdag er dei klare til å arrangera Suldals første uoffisielle norgesmeisterskap i UFO-akebrett ned Sandsbrauta. Gata, frå Sand Sport til Heim Design, blir stengt under meisterskapet, og Sandsgruppa stiller med tilkøyrt snø og gode føre-forhald.
Måndag prøvekøyrde dei løypa og lover at her kan akebretta komme opp i stor fart.
Livleg på Torjå
Nå oppmodar dei alle til å melda seg på i god tid. Der blir konkurrert i to klassar, barn og open klasse. Beste antrekk blir sjølvsagt premiert, og Jårvik lover mange flotte premiar undervegs til dei andre tøffingane også.
– Me konkurrerer med raudt og blått akebrett, og her er det utslagsmetoden som gjeld, forklarer sentrumsleiaren.
På Torjå blir det pølser på grillen og sal av diverse mat. I tillegg til ei stor snøhaug, der dei minste kan boltra seg på eige ansvar.
Nora Bogevedt Jenssen