Geir Bakka, Leif Bakka med Jon Ove Mehus i trillebåra og Werner Bakka med Tone Margunn Viken er klare for marknad. I morgon er vel 30 tilsette og frivillige klare til dyst.

Møgedalsgjengen er klare

I morgon er det på ny klart for Møgedals-marknad

Marta-Brit Lunde marta.brit@suldalsposten.no

Publisert: 05.10.2018 07:00 Sist oppdatert: 09:00

Heile 32 gonger tidlegare har bedrifta invitert inn til haustmarknad i Bergekrossen. Nå er dei snart klare for yrande liv rundt novene. I fjor var over 2700 besøkjande innom marknaden. Til laurdag håpar dei på godvêr og at mange tar turen.

Stordugnad
Men før det blir det rydding, kosting og rigging både ute og inne. Onsdag var det stordugnad på huset. Ingen liten jobb, men mannskapet stod klare med oppbretta ermer.
Leif Bakka røper at det vil bli ei prelansering av ein ny traktormodell på marknadsdagen, doningen kjem heilt frå Kløfta på staseleg suldalsbesøk. Vidare kjem røldøl Oddbjørn Lynghammar og fortel om eigne erfaringar som gründer og korleis det er å driva næringsliv i grende-Norge.

Gratis skyss
I år blir det inga motorsagkasting, men Bakka kan lova ein konkurranse frå motorsag-leverandøren. Elles blir det som tidlegare år god marknadsstemning på heile området, auksjon, følmønstring og kåring av lam. Eit variert program for både små og store, der marknadsmakarane håpar folk vil kosa seg, drøsa og gjere ein god handel.
Parkeringsplassar er det ikkje flust av i Bergekrossen. Men bedrifta har hyra inn to bussar, til å skyssa publikum opp og ned frå Garaneset. Og det til ein endå billegare pris enn Kolumbus einkroners-billett.