Målprisen 2018 til Esther Moe

Det var ei rørt og glad Esther Moe som mottok Rogaland Mållag sin målpris for 2018 på Suldal Mållag sin nyttårsfest.

Leiar i Rogaland Mållag, Magne Viggo Høyland frå Time, hadde tatt turen til Sand og Kulturhuset på laurdag. Med seg hadde han utmerking, blomar, heider og ære til redaktøren i Suldalsposten, Esther Moe.

Stolt og rørt
Esther Moe fortel at ho er stolt og rørt over ei slik utmerking. Ho er stolt av Suldalsposten og over lesarane, som er kritiske og interesserte.
– Det nynorske språket er poetisk, men har også mykje tyngde i seg. Det det kan brukast til alt! Den beste rekrutteringsmetoden er å leika seg med språket og kosa seg med nynorsken.
–Eg er audmjuk. Det er så mange verdige mottakarar til ein slik pris her i Rogaland, seier ei rørt og glad Esther Moe.

Strålande skribent
I si grunngjeving for prisen, framheva Høyland Suldalsposten, med redaktør Esther Moe i spissen, som ei av dei beste nynorskavisene i landet. Han beskriv vinnaren som ein strålande skribent og munnleg formidlar, som er til inspirasjon for mange.
Høyland fortel at arbeidet med å fremja nynorsk går framover. Men sjølv om det stadig kjem fleire og betre digitale læremidler, må framleis ofte både dette og andre rettar, spesielt i skulesamanheng, etterspørjast. Han lova også stor feiring neste år, når Mållaget er 100 år.

Frå grunngjevinga:
Her i Suldal har de ei av dei beste nynorsk avisene i landet.
Ho er ein strålande skribent og formidlar nynorsk på ein strålande måte både skriftleg og muntlig. Ho er og ein synleg og trygg nynorskstemme som er til inspirasjon for andre. Den som eg snakkar om er redaktøren i Suldalsposten, Esther Moe.
Rogaland Mållag vil heidra henne med Målprisen for 2018.

Lena Nergård