Loddar  ut  sjølvlaga  bunadskjorte  til  inntekt  for  Luftambulansen

Driftige eldsjeler. F.v. Marita Bog, Bente Hjorteland Erfjord og Gro Erfjord med flotte hovudgevinstar til både vaksne og barn. Foto: privat.

Loddar ut sjølvlaga bunadskjorte til inntekt for Luftambulansen

av Esther Moe

Det er langt frå rusk når Bente Hjorteland Erfjord realiserer ein gammal draum og drar til med basar til inntekt for Norsk Luftambulanse på skulen i Erfjord skjærtorsdag.
Hovudpremien for dei vaksne er ikkje ringare enn ei bunadsskjorte ho sjølv har brodert og montert, og til den følgjer ei beltespenne i sølv dei har fått av sølvsmeden på Finnøy.

Houvdtrekkplaster i lin og sølv
– Eg sa det på pauserommet, at er det ein ting eg skal gjera i mitt liv, så er det å få til denne basaren, ler den driftige dama, som har med seg arbeidskollegaene Gro Erfjord og Marita Bog i arbeidet.
Dei tre skal koka betasuppe frå botnen, varta opp med kaffi og kaker, det blir musikk og sjølvsagt tid til drøs, men elles trur Bente at dei treng tida for å trekkja alle gevinstane.
– Me er heilt overvelda over alt me har fått, og ungane har si eiga bok, hovudgevinsten deira er ei dokke med sydde klede, seng og klesstativ, reklamerer eldsjela som også lokkar med trøtraktor.
– Me håpar det kjem mange, mange folk, og kvar ei krone går rett til Luftambulansen!