Lag potetkaker!
Takka meg til herlegdom! Varme, nysteikte potetkaker med godt smør og raust med sukker. Kven kan motstå noko slikt?
Sigrun Sandvik har nett steikt ferdig siste potetkaka, det vart 16 av dei i dag. Nå ligg dei ut over eit handkle på rist og dampar litt av seg.
Men det er ikkje nødvendig å venta til dei er blitt kalde før ein forsyner seg. Snarare tvert om.
– Vær så god, seier ho og byr med handa mot herlegdomen. Skikkeleg smør, og gneistrande kvitt sukker frå ein neverkopp er sett fram til dei fine, lysegule kakene.
Potetkaker
500 g kokte poteter
2 dl mjølk, helst heilmjølk
130 g kveitemjøl
ei klype salt
Slik blir det gjort i det sandvikske kjøkkenet:
• Kokte poteter (utan skrell) skal kvernast opp. Du kan også kneppa med gaffel, eller stappa dei.
• Spe potetene med mjølk og kveitemjøl til du får ein fast og fin deig som ikkje klissar. Den er ikkje så fast som ein lefsedeig, ikkje så laus som ei potetstappe. Spe med meir mjøl viss den blir for laus.
• Ikkje rør lenge, då blir deigen seig!
• Ta ein liten handfull deig og kjevl eller klapp den ut til ei rund kake. Sjå korleis Sigrun gjer det HER. Den skal vera så tynn som du vil ha den, den vil ikkje tjukna særleg på takka.
• Steik på ei godt varm takke. Sigrun har brytaren på 8 av 10.
• Steik til kakene har fått fine, brune flekker på eine side. Snu og steik likt på andre sida.
• Legg dei til avkjøling på handkle på rist.
Dei kan godt frysast, pass då på at dei er heilt avkjølte først. Bør i så fall brukast med ein gong dei er tinte.
Men sjansen er størst for at du aldri får dei i frysaren, du får garantert avsetnad på dei viss du har fleire munnar å metta i heimen!
Denne saka, laga av Toyni Tobekk, er henta frå arkivet og var på trykk i avisa hausten 2014. Oppskrifta er også i boka Matglede i Suldal.
