Lag eltefritt grytebrød!
Perfekt brød som treng veldig lite arbeid, men desto meir tid. Supert til suppe, eller med godt påskepålegg til ein lang frukost i solveggen.
Oppskriftene under passer til ei lita gryte, har du større gryte, doblar du mengdene. Oppskrifta på det fine brødet er frå matpaabordet.no, og det grove kjem frå trinesmatblogg.no.
Oppskrift fint brød
500 gram kveitemjøl
1⁄4 ts tørrgjær
1 1⁄2 ts salt
4 dl vatn
Oppskrift grovt brød
250 gram kveitemjøl
125 gram havregryn
50 gram kruskakli
1⁄2 ts tørrgjær
1 ts honning
1 ts grovt havsalt
4 dl vatn
Dette brødet kjem under ekstra grovt på brødskalaen.
Slik gjer du:
Bland ingrediensane lett saman.
Lat deigen heva frå 16 til 24 timar under lokk eller klede.
Kvelv deigen over på eit bakepapir, eller ei bakstematte med godt med mjøl på. Bruk ein slikkepott og brett deigen inn mot midten nokre gonger. (Som du brettar ein konvolutt)
La deigen kvila/etterheva seg i nye to timar. Når det er gått ein time, skal den eldfaste gryta med lokk, setjast inn i forvarma omn, på 250 grader.
Hell deigen over i den glovarme gryta og steik midt i omnen i 30 minutt. Etter 30 minutt ta av loket og reduser gradene til 220 og steik brødet dei siste 15 minutta.
Nå har du eit flott grytebrød, klart til avkjøling på rist. Skorpa held seg fin og sprø om du pakkar brødet inn i eit kjøkkenhandkle.
