Kva skal eg bli?

Yrkes- og utdanningsmessa 2018:

I dag, torsdag, er det på ny klart for Yrkes- og utdanningsmessa i indre Ryfylke, og i år det i Sauda det skjer.

Tre tiandeklassingar om yrke og utdanning:
– Kva stand skal du besøkja på messa?
– Kva linje har du tenkt å gå neste år?

Maria Andrine Hagen
– Eg har lyst å besøkja politiet, Forsvaret og Weldone for å sjekka ut kva deira jobbar går ut på.
– Mest sannsynleg blir det studiespesialisering i Stavanger.

Yujiro Indo
– Politiet, Forsvaret og Kulp. Desse verka interessante og kjekke.
– Eg har tenkt å gå Toppvolley, der er det opptak om to veker.

Eliane Svendsen Narmo
– Politiet, Norsk Stein og Suldal Transport. Eg vil læra meir om jobbane deira.
– Det står mellom studiespesialisering og helse. Eg trur det blir studiespesialisering i Sauda og så å gå andreåret i Stavanger.

Varma opp
I førekant har elevane varma opp. I sist veke var tiandeklassingane i Suldal på informasjonsmøte saman med foreldra på Sand skule. Der fekk dei unge ein smakebit av næringslivet i kommunen og kva tilbod ein kan velja blant i vidaregåande opplæring.

Mange på messa
Det er venta opp mot 700 besøkjande på yrkesmessedagen i Saudahallen. Rundt 15 suldalsbedrifter er melde på, av totalt cirka 36 bedrifter i regionen. For lokale bedrifter er det ein plass å visa seg fram. Messa er ikkje berre for dei unge, men også andre som vil sjekka ut arbeids- og utdanningstilbodet i Ryfylke.

Spørja om yrke
17 utdanningsinstitusjonar har stand i dag. Elevar, frå tiandetrinn til og med tredje året på vidaregåande, skal velja seg ut tre standar dei skal innom. Eit slikt besøk varer i sju minutt, og då gjeld det å nytta sjansen til å spørja og grava om yrket, utdanningsvegen og anna ein lurer på.