Kor er champagnen?

Leiar:

Fråhaldsfolket får bera over, les gjerne brus med champagnesmak eller eplemost. Kanskje eit flagg eller ei lita klappsalve, eller ein tommel opp.

Eit lite teikn på glede og feiring. Men nei, då fleirtalet i Suldal kommunestyret sa ja til den gjennomarbeidde investeringa Suldal Bad, minna forsamlinga mest om ein flokk fortapte.

Det store alvoret låg heile kvelden over salen og gangane, den kalde pause-pizzaen som måtte venta på debatten, dei låge stemmene og nesten fortvila andleta.

Dei mest usikre og vaklande hadde det ikkje godt, og det står respekt av å reisa seg opp og vera ærleg med tvilen, slik Magne Langeland gjorde i sist veke.
Det gjer sjølvsagt inntrykk å sjå ein politisk kollega og sambygding i stort press, og tysdag kveld var det heller aldri tvil om at Suldal Bad-tilhengjarane hadde det meir spennande enn det som kjentest godt, og varaordførar Kari Vaage Gjuvsland erklærte seg då også som kvalmen på eitt punkt. Når tilhengjarane av badet snakkar, er det heller ikkje moro og velvære først. Nei, dei lar vitaminane og snusfornufta brøyta, den som hadde hatt fem kroner for kvar gong folkehelsa var nemnt på talarstolen sist veke, hadde hatt ein god slump.

Når då motstandarane av signalbygget og storbadet, på toppen av dette, kjem med økonomiske dommedagsprofetiar sveipte i slitne husmannsklede, er biletet komplett. Og bak syng grendene versus kommunesenteret, den evige rivinga om kven som får mest og minst.

Suldal kommune er ein kommune som flyt over av vatn og energi, bokstaveleg talt. Me huser produksjonen av heile åtte prosent av den krafta Norge treng og brukar. Det skulle vel berre mangla at me ikkje hadde til meir enn makrell i tomat på bordet og bensin på tanken kvar dag.

Sjølvsagt er investeringa i og den framtidige drifta av Suldal bad ei sak som krev seriøse vurderingar og kloke strategiar. Eit godt grunnlag er lagt, marknaden er for ein gongs skuld på lag, og nå må kommuneleiinga jobba hardt og godt for å få næringslivet på lag.

Men først av alt, skal me ikkje spretta litt mental champagne og klappa litt for Suldal Bad; for det ser sanneleg ut til at suldalssjela treng å rutsja litt.

Me er gode på alvor i Suldal, men me me klara å løysa billett til Suldal bad utan først å måtta konsultera prest eller psykolog.