– Jo fleire me er, jo sterkare står me

Mental Helse:

Det seier Odd Inge Utbjoa som nå er blitt med i styret i Mental Helse i Suldal. Elisabeth Brekke, også ho ny i laget, nikkar til Utbjoa.

Rundt bordet sit også Anne Berit Skeie og Wenche Nygaard, to røynde frivillige i laget. Avisa møtte dei fire då Mental helse i Rogaland hadde lagt årsmøtesamlinga til Sand.

Skummelt, ja
– Eg har vore såkalla sovande medlem i mange år, men så dunka Odd Inge borti meg og overtala meg også til å bli med, seier Brekke.
Mental Helse, som vart starta i Suldal for fleire år sidan, ønskjer seg nå endå fleire aktive medlemmar.
Dei forstår at det for mange kan verka skummelt å bli med i eit lag som er ein medlemsorganisasjon for alle menneske med psykiske helseproblem, pårørande og andre interesserte.

For fleire
Men det er eigentleg ikkje det. Ein treng ikkje har vore innlagt for å bli med her, seier Brekke som brenn for å få ned terskelen til å bli med i laget, men også ufarleggjera det å snakka om psykisk helse.
– Alle vil kjenna, ein eller fleire gonger, at livet ikkje er greitt. Livet går opp og ned. Dagar som er dritt. Men ikkje gjer folk til ein diagnose. Sjå menneske bak sjukdommen, seier Brekke.
– Ein seier ofte: Du har influensa, men er bipolar, legg Skeie til.

Tabu og utvitskap
Utbjoa fortel at han hans erfaringar om å vera open om sin psykiske sjukdom i Suldal, har gjort at han har fått kontakt med mange andre som slit, hjelpt andre i same situasjon. Og fått støtte frå andre med å stå fram, som til dømes då han kjempa for Loftet som var førelått lagt ned.
– Folk ser meg som eg er, sjølv om eg har dårlege periodar, seier Utbjoa ærleg.
Alle fire snakkar om kor fort ein kan laga seg førestillingar og fordommar, ofte som botnar i uvitskap, og om at det er tabu å snakka om den psykiske helsa.
– Me er avhengige av erfaringar frå folk og brukarperspektivet. Brukarane veit best, seier Nygaard.

Møteplass
Brekke trekkjer fram einsemd, ho trur fleire suldøler kjenner på det, men ikkje vågar å stå fram. Unge som eldre, i familie og ekteskap eller åleine.
– Eg har lese ein definisjon på einsemd: Einsemd er ikkje ein lengsel etter folk, men etter sjeler ein kjenner seg i slekt med, seier Brekke, som også blir meir enn oppgitt over eit samfunn prega av prestasjonar og fasade.
Ho brenn for å få til ein møtestad for mange, slik Mental Helse i Sauda har fått til. Ein møtestad der diagnose ikkje er billetten for å bli med. Nabo-laget i Sauda har langt over 100 medlemmer og har 20 års erfaring med å byggja laget opp.
– Berre ta kontakt og bli med, oppmodar Utbjoa til lesarar som lurer på å engasjera seg.