Jåleri i sentrum

Leiar

Sentrum er i vinden for tida, det skulle berre mangla. Etter åtte års asfaltvandring mellom bilar og gode intensjonar som enn så lenge berre har brulagt vegen til atter nye somrar med mellombelse løysingar på torget, begynner det endeleg å nærma seg.
Vel 26 millionar kroner står til rådvelde, og konsulentane slit ikkje med å få utgiftene til å strekkja til. Planen for det nye torget med lys, møblement, beplanting og skifer frå øvste hylle, fortel at her er knapt snudd på ei krone. Per i dag er planen for Suldal bad og kostnadsramma heftig diskutert, men ingen har så mykje som ytra tanken om å spara på Torjå, der planane per i dag har ein førebels prislapp på 24 millionar kroner.
Det dei fleste nå er mest opptatt av er korleis me skal få nærkontakt med ein fjord som både er vakker og lunefull.
Så oppslukte er både borgarar og folkevalde at namne-ranet som er i ferd med å gå føre seg på høglys dag, ser ut til å passera heilt ubemerka. Med unnatak av tidlegare direktør ved Ryfylkemuseet, Roy Høbo, som song ut ei linje i sist utgåve av avisa.
Konsulentane i arkitektfirmaet må tydelegvis kjenna seg som Adam på hans første dag i Edens hage når dei har inntatt Sand. Bekkjatorget er føreslått omdøypt til Reisetorget, utan anna grunngiving enn at buss og drosje er tenkt plassert her og at hurtigbåten skal leggja til her når ferjekaien forsvinn.
I skisseprosjektet operer  konsulentane utan vidare med Reisetorget på staden der namnet er Bekkjatorget.
Kvifor så få reaksjonar? Etter tysdagens møte i kommunestyret er det klart at dei folkevalde har meir enn nok med å hengja med i informasjonssvingane. For andre er namn kanskje uviktig?
Eit prosjekt kan tena på blikk utanfrå. Det er ingen tvil om at Landskapsfabrikken har spelt inn mange gode idear og tankar for torget som skaper begeistring og som løfter oss.
Men det er faktisk ingen som har bede om nye namn på Sand. Bestillinga er eit nytt torg. Stadnamna våre er anker til historia og identiteten vår. Dei skal ikkje knipsast vekk. Det heiter Bekkjatorget og det er godt nok. Meir enn godt nok.

Esther Moe
Redaksjonsleiar