Innsendt: Arbeidaranes dag i Suldal

Tradisjonen tru vart arbeidaranes dag markert på Kulturhuset i Suldal. Leiaren for Rogaland SV, Ingrid Fiskaa, hadde hovudtalen, og snakka om heltar som gir ho håp. Til dømes Løvemammaene (og pappaene) som er foreldre til sterkt pleietrengande og/eller funksjonshemma ungar. Ungar som treng konstant pleie, oppsyn og medisinsk oppfølging. Og når dei er heime, overtar foreldra som sjukepleiarar. Løvemammaene har teke opp kampen mot regjeringa si kutt i pleiepengane. Det er pengar som skal erstatte arbeidsinntekt når ein har omsorg for eit ungar som treng kontinuerlig tilsyn og pleie.

- Løvemammaene og pleiepengesaka viser kor viktig fellesskapet er. Fellesskapet skal stilla opp når me strevar litt ekstra. Fordi livet er uforutseieleg. Me er friske i dag, og kan gå på ein smell i morgon. Kven som helst kan få ein unge som er kronisk sjuk. Velferdsstaten skal vera eit sikkerheitsnett på vanskelege dagar. Velferdsstaten skal og vera ein trampoline å ta sats på, sånn at draumane våre kan bli verkelege, sa Fiskaa.

Dei andre heltane Fiskaa trakk fram, var Bunadsgeriljaen i Kristiansund som kjempar for den lokale fødeavdelinga, og om dei fem elektrikarane i Traftec som streika i over 300 dagar for tariffavtale, ein kamp dei nettopp vann.

Etter talen blei det arbeidarsongar med Reidar Sand, tredje kandidat på fylkestingslista til SV og noverande fylkessekretær. Morten Bakken frå Suldal AP og tillitsvalt for Fellesforbundet, haldt ein appell der han mellom anna tok opp behovet for faste og heile stillingar.

Amnestygruppa i Suldal hadde ein appell om dei dårlege arbeidsforholda i Iran. Mellom anna at tilsette som krev lønna si risikerer å bli fengsla og torturerte. Med seg hadde dei ein underskriftskampanje der dei ba om å få Esmail Bakhshi og Sepideh Gholian lauslatt etter at dei begge har blitt fengsla for å kjempa for arbeidsrettar.

Mellom 30 og 40 møtte opp for å feira arbeidaranes dag.

Anette Opheim, Suldal SV

Anette Opheim

Zoom Førre Neste