–  I  det  stille

Årets juleblom:

– I det stille

Torbjørg Skretting Olimstad tar smilande imot juleblomen frå Suldalsposten.

av Nora Bogetvedt Jenssen

– Tenk at eg skulle få denne, det er nesten ikkje til å tru.

Ho synest det er kjekt å hjelpa folk rundt seg som treng det. Oppvaksen som speidar, meiner ho det ligg i henne å hjelpa.

Ho arbeider i det stille, er beskjeden på eigne vegner, men gjer mykje godt. Ho besøker sjuke, har omtanke for mange og gir ei hjelpande hand mange stader. Torbjørg er langt meir aktiv enn dei fleste, men fordi ho aldri framhevar seg sjølv, blir ho ikkje sett av mange.

Torbjørg flytter på spøtet i sofaen, dottera til ei venninne skal få glede av den mjuke jakka i patentstrikk, når den blir ferdig.
– Eg er glad dei nemnde det med at eg hjelper i det stille. Det er det eg helst vil. Når eg har det så godt sjølv, er det kjekt å kunna hjelpa andre.
Ho likar å vera aktiv og meiner det gir glede å kunna hjelpa folk rundt seg som treng litt ekstra.
– Eg kunne sikkert gjort meir, men vinn ikkje med meir.

Nå gler ho seg til julehøgtida, med venner og familie på besøk i Salomonskleiva i Suldalsosen.
– Sjå, seier ho i det me tar farvel og peiker over mot fjella.
– I dag skin sola på huset, er det ikkje skjønt!