Førjulsdrøsen med Astrid Kvæstad

Kor er du i løypa med juleførebuingar?
– Eg har begynt litt med pakkar, å laga, men eg skal laga meir. Det går i alkohol, for det meste. Eg har laga plommelikør og så skal laga heimelaga Baileys, kaffilikør.

Har du adventskalender?
– Ja, det har eg. Eg kjøper alltid Røde Kors-kalenderen, då støtter eg ei god sak og så er det fine premiar. I år har eg fått den.

Korleis pyntar du i adventstida?
– Eg pyntar med adventsstjerne og lysestake. Eigentleg ikkje så mykje anna. Eg brenn mykje lys, slik eg plar gjera heile hausten og vinteren.

Når startar du å kjøpa julepresangar; Lagar du sjølv, eller gir du noko veldig alternativt?
– Det er varierande. I år er eg seint ute, eg begynte i starten på november. Eg plar vera ferdig før desember startar. Eg både lagar og kjøper.

Korleis skal du feira jula i år?
– Denne jula skal eg vera hjå bror, svigerinne og tanteungane.

Kva blir middagsmenyen på julaftan?
– Då trur eg det blir pinnabog, pinnakjøt med litt meir kjøt. Svigerinna mi, Anne Brit, står for maten. Dessert veit eg ikkje, kanskje karamellpudding. Godt blir det uansett.

Kva tre skal du ha?
– Det blir slik eg har gjort før om åra, å kjøpa edelgran av Kjell Frode Lie. Han sel juletre til inntekt for Bokn Røde Kors.

Kakesortar som må stå framme i jula?
– Ja, skal me sjå. Eg er glad i konfekt. Eg lagar Rocky road som inneheld sjokolade, minimarshmallows, Dumle, som eg deler i to, og kva er det siste nå igjen. Jo, peanøtter. Blander dette og har det i ei form. Når dette er kaldt skjer eg det opp i konfektbitar. Så må eg ha serinakaker, suldalslefse og nordlandslefser. Det er også kjekke gåver å gi vekk. Annfrid Halsne har lært meg å baka lefse.

Har du ein gjenstand som er spesielt knytt til jula for deg?
– Det må vera fløyen og kjevla til bestemor. Det er så koseleg, på fløyen er det eit lite søkk, vil tru det er til å ha tommelen i. Det er fint å tenkja, når eg held tommelen min der, at ho har halde sin tommel der.

– Eg elskar jul og har sikkert nok juletrepynt til å pynta tre juletre.

Eit juleminne du gjerne deler?
– Det må vera den jula det begynte å brenna på Øyna. Eg og storesøster mi tok fjoset, medan mor var inne og kokte middag. Brått gjekk straumen og mjølkeapparatet deiste i golvet og fuglane i fjoset vart heilt forvirra og fauk i oss. Då me gjekk ut, såg me at det brann i ei mast i Øyna, ekrene nedføre garden. Mor, minnest eg, flytte grytene til vedomnen. Eg hugsar ikkje kor lenge straumen var vekke, men då den kom igjen, var det ut igjen å mjølka ferdig. Det blei sein julemiddag den jula.

Favorittjulesong- eller salme som får fram julestemninga?
– Der hadde mor og eg ein diskusjon. For meg er det songen Eg veit i himmerik ei borg som Jan Werner Danielsen syng på si juleplate. Mor meinte dette ikkje var ein julesong, men for meg er det det.

Og julefilmen med stor J?
– Det er Love actually. Den blir eg aldri lei. Eg kan sjå den fleire gongen same jula.

Skriv du mange julekort?
– I fjor sendte eg julekort for første gong, trur eg. Skal ikkje sjå vekk frå at det var første og siste gong. Eg laga scrapbook-kort, men det blir ingenting av det i år. Det er kjekt å få julekort, då.

Kva ønskjer du deg under treet?
– I år ønskjer eg meg ei ny og oppdatert soppbok. Ja, eg er soppelskar. Astrid tel opp minst åtte ulike sortar ho har funne denne hausten.

Ein julepresang du minnest godt?
– Ja! Det må vera den gongen då det låg ein pakke under treet, ein felles pakke til oss søskena. Far sat og flirte, hugsar eg, og bad oss om å kjenna på pakken. Det var noko pinnhardt, men ingen av oss fann ut kva det var. Då me pakka opp låg det ei finpussa vedaskia der han hadde skrive på med tusj at gåva var ein halv famn med ved.

Når hiv du ut treet?
– Eg har det så lenge eg kan. Til eg skjemst. Men treet er ute før trettande dag jul. Eg tar det inn og pyntar det tidleg, eg kan fint setja det opp ei veke før jul.