– Forferdeleg og fint
Verdsrekordforsøk i høgdemeter
Glenn Tore Løland brukte eitt døger av pinstihelga på ein nokså uvanleg skitur.
Saman med to landslagskameratar, vossing Lars Erik Skjervheim og Malene Haukøy frå Sogndal, la Løland ut på ein døgerlang tur, der målet var å samla flest mogleg høgdemeter på 24 timar og å setja ny verdsrekord.
Motbakke i Myrkdalen
Løypa var lagt i bakkane i Myrkdalen på Voss, der ein runde var på 460 høgdemeter. Laurdag ettermiddag, klokka 15.00, starta dei tre løparane på verdsrekordforsøket.
– Det var eigentleg heilt forferdeleg, men også kjekt, fortel Løland.
Alle dei tre hardhausane slo dei gamle rekordane. Skjervheim har nå den nye verdsrekorden med 20 939 høgdemeter. Løland greidde 19 124 høgdemeter og knuste med det også den gamle rekorden. Haukøy sikra seg rekorden for kvinner med 15 400 høgdemeter.
40 rundar
– Eg er kjempenøgd og klarte meir enn eg hadde tenkt. Han hadde lagt opp rundetidene til å komma over 19 000 høgdemeter, og det gjekk fint. Totalt vart det 40 heile rundar, opp ned, opp ned. Eit anna mål var å testa kropp og hovud. Tidlegare har han gått turar på 19 timar, og å halda på nattestid, har han erfaring med frå nattorientering.
Lagprosjekt
Forsøket har dei tre kokt på i løpet av årets sesong.
– Me har levd i lag alle tre i vinter og diskutert lagprosjektet. I helga klaffa alt, vêret og nok folk til å hjelpa til med
mat, drikke, klede og rett teljing av rundar.
– Me starta i t-skjorte i flott sommarvêr og fram til sju-åtte-tida var det som å gå ein tur. Så byrja snøen å bli hardare.
Mest utan stopp
Då det var gått i 10 timar og 14 nye timar venta, fekk hovudet noko å jobba med. Det var heller ikkje fritt for at han kjende det i rygg og hofter.
– Ojojoj, tenkte eg då. Han ler.
Men svevnen tok han ikkje, noko som overraska han. Gjennom natta var det på med meir klede og å få i seg nok næring, alt i fart.
– Totalt hadde eg åtte minutt i løpet av døgnet der eg stod heilt stille.
Ikkje prøv dette heima
Då natta gjekk mot dag, lysna det også mentalt.
– Ja, det var kjempefint då det lysna. Og ikkje minst at tilbakelagde timar auka i takt med klokka som nærma seg søndag ettermiddag.
Han er einig i at det er sært og ein type døgning for spesielt interesserte.
– Eg anbefalar ingen å gjera dette, nei.
Heim i eiga seng var det ikkje problem å sovna.
Marta-Brit Lunde/Foto: Haakon Lundkvist
Artikkelen held fram under annonsen.
