For ei oppleving han gav!

ÅRETS JULEBLOM:

Mange av lesarane ønskte at Martin Nygård Haug måtte få juleblomen i år. Ei skriv at det han har gitt av opplevingar til suldøler og gjester med The Wall, verkeleg fortener ein ekstra blomst.

Panneluggen min han knapt nok lagt seg etter å ha blitt blese til vêrs ein laurdagskveld på Kulturhuset. For ei oppleving for publikum! Og for ei oppleving det må ha vore for alle som deltok på scenen. Dei blei løfta og fekk bløma, stødig leia av Nygård Haug.


Martin sjølv gliser breitt når han får høyra alle godorda. Framfor omnen, tredje søndag i advent og snart på letten til å gi suldølen nye opplevingar i årets Medan me ventar.

– Eg set stor pris på å høyra så flotte ord og er veldig takknemleg for alt eg har fått vore med på. The Wall har vore det store albumet for meg, og eg har lenge gått og hatt lyst til å ta fatt på det.
Organisten fortel vidare at han gjekk til oppgåva med ærefrykt. Det har vore ei stor oppgåva å få alt som er storslått, til å verkeleg bli det.
– Eg trur me klarte å få det til, smiler han og stryk på katten i fanget. Han er opptatt av å få takka alle som var med, frå kor til enkeltmedlemmer.

Jula er ei travel tid når ein er organist og adventstida også.
– Eg skal spela på Jelsa og i Erfjord julaftan og på Suldalsosen første juledag, Veerle dekkjer resten. Ho skal til Nesflaten og til Sand, julaftan.
På spørsmål om kor dei travle organistane skal feira julaftan, blir han litt usikker der framføre omnen, ei veke før jul.
– Eg har skrive det ned i kalenderen, er ganske sikker på at me skal vera på Jelsa, men det er langt fram, seier han, ler og kastar katten Tolstoj på golvet.