– Folkefest utan sidestykke

Handelstand, kommune og næringsliv drar alle i lag for å laga flotte marknadsdagar. Foto: Marta-Brit Lunde

– Folkefest utan sidestykke

av Nora Bogetvedt Jenssen

Marit Larsen er i farta to dagar før festivalhelga brakar laus og meiner det er som med julaftan; ein kjem alltid i mål.Ryfylkedagsgeneralen lovprisar det flotte vêret, og er sikker på at helga blir ein folkefest utan sidestykke.

Mykje nytt
Sidan Larsen starta å jobba med Ryfylkedagane for ni år sidan, har mykje endra seg.
– Då var budsjettet vårt 70 000 kroner, i år er det 550 000 kroner.
Å måtta trekkja fram det ho gler seg mest til i eit langt og innhaldsrikt program, er ikkje enkelt.
– Men eg må jo seia at eg gler meg over banda som kjem og skal spela i teltet. Plumbo er klare, dei har eg nett snakka med på telefon. Eg lova dei at me skal bli det beste vertskapet dei nokon gong har hatt. Larsen ler og trekkjer pusten.
– Pakkers skal sleppa ny singel, og det er jo eit eventyr at me har fått Valkyrien. Og så gler eg meg veldig til Mario Adjemi frå Erfjord og Morning Crows.

Marit Larsen har kontroll på det meste dagane før og ber om at folk passar på å få i seg nok drikke i varmen.


Ungdommen tar teltet
Allereie torsdag blir teltet på Verven innvigd. Då er det ungdommen, som tidlegare år har hatt ungdomsfest i Sandhallen, som nå skal festa i teltet. Larsen lover god musikk og innslag av vatn.
Når kremmarane er klare for sal i Gata, blir det meir spennande mat enn tidlegare. Talet på utstillarar er som før om åra, og i år har komiteen samla alle barneaktivitetane på Hydrokaien. Der kan ein òg treffa på den nye rekrutteringspatruljen, som vil motivera utflytta suldøler til å komma heim igjen.

Helikopter-tur
Det er mange år sidan helikopter-tur var innslag på Ryfylkedagane, men i år er det nye sjansar for å sjå ned på strandstaden frå høgt til vêrs. Eliasbåten kjem til Nordenden og utanfor Sand båtforeining legg 17-meter lange Orianda til. Dei som vil om bord i seglbåten er velkomne til det på laurdagen. Sørenden av Gata er reservert for bil og båt, messing og krom.
– Her blir det mykje brom, brom, ler Larsen.

Utstillingar og konsertar
Kulturhuset og distriktsmusikarane byr på sommarlege tonar, Kristin & Kristin har sommarkonsert i Sand kyrkje, Njål Lunde stiller ut på Suldal Kunstlag si sommarutstilling, klyvarlaget arrangerer bruskasseklatring og BlueDot rakettskyting. På Ryfylkemuseet har dei ulike utstillingar og sjøvartokt, og sogelaget serverer gamle foto i Mimrestova. Suldal Jakt og Fiskelag utfordrar dei minste til fiskekonkurranse og Røde Kors slepper som vanleg ut endene sine i elveosen. På søndag er det grilldag på Nesflaten, og dette er berre noko av det som står i årets Ryfylkedags-program.