Festivalveke på kulturskulen
I kveld, fredag, startar årets Kulturskulefestival i Suldal.
Det er Suldal kulturskule som, for andre året, byr inn til ei veke fullspekka med mange og ulike aktivitetar og arrangement. Her er ein liten smakebit på kva ein kan gjera og oppleva.
Workshop
Om ein vil, kan ein prøva seg på ulike instrument, som hardingfele, messinginstrument eller gitar. Vil ein heller testa ut song, dans eller hip hop, ja så er det også sjanse for det.
Mange av kveldane blir det konsertar, der det startar med ein familiekonsert i kveld, fredag. Vidare vil det bli folkemusikk-konsert, kyrkjekonsert i kapellet i Marvik og ein norsk-fransk konsertkveld torsdag. I løpet av veka vil det også bli konsertar rundt om i grendene på grunnskulane.
Birkebeinerprinsen
Men det blir også føredrag. Måndag kveld held universitetslektor og utflytta suldøl, Svanaug Lunde, eit inspirasjonsføredrag med tema livsglede og livsmeistring.
Onsdag kveld byr kulturskulen inn til framsyning av Birkebeinerprinsen, som 75 elevar var og viste fram på Barneteaterfestivalen på Stord sist helg. Dagen etter blir det skuleframsyning av same stykke.
