Fantastisk sesongstart i Suldalslågen
20. juli er dagen pasjonerte laksefiskarar har telt ned til. Då gjekk startskotet for årets fiske ovanom fossen i Suldalslågen.
Så langt er den største laksen fiska på Førland III, laurdag. Det var ein villaks på 12,9 kilo. Nedanom fossen blei det teke ein merkt laks på 18 kilo 10. juli.
Laksefiske på blå resept
Hjå Jone Moe i Mo står bilane tett i tett utanfor hyttane fredag morgon. Somme fiskarar har vore i elva sidan startskotet gjekk midnatt og kviler ut i hyttene i morgontimane, andre sit med kaffikoppen, speidar ned i elva og sit klare til å springa om ein av fiskekompisane skulle få napp.
Hans Beiermann frå Haugesund er primus motor for ti fiskarar frå Haugalandet. Det er velferdklubben i Equinor på Kårstø som leiger fiske hjå Jone Mo tre helger gjennom sesongen.
Beiermann letter på capsen og myser utover elva.
– Laksefiske skulle vore på blå resept, veit du!
Laks på ti kilo
Det glitrar i augo då han fortel om fangsten eit par timar tidlegare. Ein hofisk i Herabakka-høla på ti kilo.
– Kjensla etter du har fått laksen på land, fått liv i den igjen og når den skyt fart tilbake i elva… du og du, då snakkar me. Fiskaren frå Haugesund kan prata langt og lenge om fisket i Suldal. Han har fiska i Lågen i 15 år.
– Suldal er jo favoritt-elva. Etter kvart er eg meir og meir knytt til plassen. Her seinkar eg skuldra, det er berre heilt fantastisk. Dronningelva dette.
På betet
Jone Moe melder om eit fantastisk fiske så langt.
– Det er blitt tatt bra med fisk øvst i elva også, og det viser at det står laks i heile elva. Det lovar godt så langt, men eg tør jo ikkje spå korleis sesongen blir, seier han. Han fortel at lite vatn i andre lakse-elver, driv fleire fiskarar til Suldal. Moe har hatt mange laksefiskarar som er her for første gong i helga, og fleire av dei fekk laks for første gong.
– Dei kjem nok tilbake, konstaterer han nøgd.
Fint vêr og god vassføring gir flotte forhold, og Moe meiner at nå må laksefiskarane kjenna si besøkelsestid. Det er endå ledige plassar i elva.
