Esther Moe blir ny redaktør

Ny redaktør frå 1. august, blir Esther Moe som i dag er redaksjonsleiar i Suldalsposten.

Astrid Espeland, dagleg leiar og redaktør, har sagt opp og går til jobben som kulturhusleiar i Sauda. Styret i avisa har vedtatt at dei nå vil gå for ein toleiarmodell der ansvaret for leiinga blir delt mellom ein dagleg leiar og ein redaktør.

Godt nøgd
Styreleiar i Suldalsposten, Arne Kleppa, er godt nøgd med at Moe tek på seg redaktøroppgåva, og håper på snarleg tilsetjing av ny dagleg leiar.
– Me er veldig godt nøgde med å ha fått Esther Moe til redaktør. Styret var samstemte og ikkje i tvil om avgjerda, fortel styreleiaren.

Spent
Redaksjonsleiar Esther Moe, ser fram til nye utfordringar i redaktørstolen.
– Korleis vil lesarane merka at det er ein ny redaktør i lokalavisa?
– Eg har ingen planar om at lesarane skal merka så mykje til det. Eg ønskjer å bidra til at Suldalsposten framleis skal vera ei god lokalavis for suldalssamfunnet. For meg inneber det å vera nyhendesvolten, kritisk, begeistra, undersøkjande og interessert i folk, og det folk driv med her, smiler Moe som i helga deltar på LLA, Landslaget for lokalaviser, sitt landsmøte.