Er Høgre det nye Senterpartiet?

Leiar:

Freudiansk glipp blir det kalla på fint, når folk forsnakkar seg på ein måte som gjer at omgivelsane tenkjer at det ikkje blei feil, men tvert om, alldeles sant og rett frå djupet.

Det var kanskje det som skjedde i sist kommunestyremøte under debatten om gigantsamarbeidet på brann og redning som Suldal nå er på full fart inn i. Der serverte Høgres Rainer Speth eit særdeles harmdirrande og opprørt innlegg over det han meiner er manglande suldølsk motstand mot eit interkommunalt brann-og redningsvesen han fryktar vil svekka Suldal når musklane og kjøttvekta på Hauglandet skal rå. Sandbuen meiner kommunen reiser seg når skatteetaten eller politiet prøver seg på å nappa stillingar, men konstaterte frå talarstolen at dei folkevalde lite seier når sentraliseringsforslaga kjem frå eiga administrativ leiing.

Det er ikkje fritt for at det lar seg høyra når ein av Senterpartiets erfarne menn, jelsabuen Ola Jelsa, går på talarstolen og erklærer Høgre-mannens innlegg for noko av det betre senterparti-politikk han har høyrt på stund, når han like fort gjer det klart at han ikkje aktar å stemma mot sentraliseringa og samarbeidet.
Noko heller ikkje resten av Sp-gruppa gjer; dei fire som stemmer for ”senterpartipolitikken” er SV og Høgre.
Politikk på bygda liknar lite på den me finn på Stortinget eller i regjeringskorridorane, det er gammalt nytt.

I Suldal framstår Senterpartiet stadig meir tydeleg som eit pragmatisk og makt-orientert parti, ofte på lag med administrasjonen. Store størrelsar har sjeldan kapasitet til å vera motstraums, den som skal vera ein torn i kjøtet på maktapparatet, må som regel vera liten og svolten.
Skulesamanslåingssaka for nokre år sidan, den opprivande legevaktsaka nyleg og nå, brannvern-samarbeidet er alle døme på at Senterpartiet lokalt ikkje minner mykje om motstraumskrafta partiet gjerne likar å framstå som på nasjonalt plan.

Senterpartiet og Jelsa har sjølvsagt sine grunnar for å tvila seg fram til eit ja til brannvernssamarbeid, men vener av bygda må unekteleg kjenna litt på uro over at bygdepartiet framfor nokon ser så liten grunn til å uroa seg over beredskapsutviklinga.

Sjølv rådmannen skriv i sine sakspapir at brannvesenets uro for å mista nye bilar og istadenfor få eldre er reell. At rådmannen meiner det likevel ikkje ”ligg i korta”, er knapt nokon fullverdig assuranse.