– Ei fantastisk dame

ÅRETS JULEBLOM:

Det blir heilt stilt i røyret når jordmor Silje Handeland får høyra at ho skal få ein av årets juleblomar frå avisa.– Er det Willy Røret, spør ho skeptisk, før ho bryt ut i ein hjarteleg lått då ho skjønar at det ikkje er spøk, men heilt på skikkeleg.

Ho er så trygg og god, alltid forståelsesfull, har eit smil på lur og har gode råd. Silje er supergod til å setta ting i perspektiv. Ho er god til å snakka med pappa, slik at han også kjenner seg ivaretatt. Silje er oppriktig interessert i tidlegare pasientar, ho er kunnskapsrik, og hennar rolege vesen smittar over på kommande mødre. Ei fantastisk dame!

– Wow! får ho fram eit par dagar etter då ho får blomen.
– For nokre flotte ord. Så flott at pappaene blei nemnde, dei er viktige, gestikulerer ho engasjert. Silje har vore fast jordmor i Suldal sidan 2007, og før det i eit vikariat frå 2003 til 2004. Ho har ansvaret for svangerskapskontrollar i Suldal og har vakt både her og i Sauda.

– Korleis er det å vera jordmor i Suldal?
– Å nei, nå begynner eg å grina. Og eg som har pynta meg med mascara og alt for at du skulle komma å ta bilde i dag.
Jordmora er kjapt borte ved vasken og ordnar opp i elendet, før ho samlar seg og får skrytt av suldølen.
– Eg har verdas beste jobb, med dei kjekkaste damene i Suldal og dei beste kollegaene på helsestasjonen. Det er verd all pendlinga. Å nei, nå blir eg rørt igjen.

Ei ny ordning som tredde i kraft frå september, gjer at ho nå skal på heimebesøk til alle som har fødd, ein til tre da- gar etter at dei er komne heim frå sjukehuset. Helsesøster skal også på besøk innan ti dagar.
– Det er så kjekt, trur eg har vore rundt om i heile kommunen etter kvart, smiler ho og seier at det første barnet ho tok imot nærmar seg 18 år nå. 2017 har vore eitt godt fødselsår for Suldal, og jordmora seier ho gler seg til å visa tala over nyttår.

Nora Bogevedt Jenssen