Butikk

Leiar:

Å vera kunde på bygda er ikkje heilt som i byen. Der dei i urbane strøk kan flagra frå butikk til butikk i kva hjørne av byen dei lystar utan sut for korleis det skal gå med hjørnebutikken, må kunden ute i distrikta finna seg i å ha butikken litt på samvitet sitt.

Ein kan lika det eller ikkje, ein kan ta omsyn til det, eller la vera, men me som bur på små stader må finna oss i å vita at handlemønsteret vårt kan innebera fortsatt liv i kassen eller kroken på døra for butikken.

Butikk er både børs og katedral på bygda, og særleg matbutikken; det er ein grunn for at departementet har eit eige program som skal bidra til å halda kolonial-hjula i gang rundt om i grendene.

Suldal har fleire sterke matvarebutikkar, som når opp i regionale og nasjonale tevlingar, det veit nok også suldølen å setja pris på.
Å ha butikk er inga sjølvfølgje i grender, både Nesflaten og Jelsa er grender som har fått prøvd livet utan opne butikkdører.

Derfor er det kanskje heilt greitt at drivarane på Jelsa seier det som det er når avisa avlegg butikken besøk. Svein Høyland, ein av dei tre eigarane som for to år sidan gjekk inn og investerte i bygget og drifta, må konstatera at butikken omset for fem-seks millionar mindre enn det dei kunne ha gjort. At tala for kundelojalitet ligg betydeleg under andre, eksemplifisert ved at Nesflaten har ein oppslutning på 98 prosent, mens Jelsa-butikken må notera seg for 67 prosent.

Det er eit dilemma. På den eine sida lever me og skal me leva i kapitalismens fridom, men det går ingen veg rundt erkjenninga av at våre frie val også definerer verda rundt oss.

Me lever ikkje i bobler og våre handlingar har konsekvensar.

Det er filosofi, og ikkje butikk. Men det er heilt greitt at butikkdrivarane på Jelsa legg røyndommen på disken. Fridommen vår rekk eit stykkje, men eit ja til noko er som regel eit nei til noko anna. Og det er få handleturar som inneber å kunna komma heim med noko i både pose og sekk.

Ein kvar står fritt, men Høyland skal ha takk for at han minner oss på realitetane. Så kan me sjølve plukka frå øvste hylle.