Billege distriktspoeng

Leiar:

To av tre kommunar seier nei til samanslåing, kan NRK melda denne veka. Kommunalminister Jan Tore Sanners visjon om den store norske kommunereforma går  regelrett nedanom og heim. I alle fall om ein legg folkets dom til grunn, i den grad dei stiller opp for å seia si meining.

Det må ein vel trygt seia er i varierande grad. Kanskje ikkje så rart når ein høyrer kommunalministeren møta store nei-tal med påminninga om at folkerøystingane berre er rådgjevande. Dette lokaldemokratiet er visst noko heft, folk er så sidrompa og redde for forandring, at det skin formeleg over. Den som kunne skaffa seg eit nytt, tenkjer dei kanskje i departementa.

Kven skulle tru at det er det same folket som over natta legg seg til nye medie-og matvanar, nye motar og andre reisemønster. Når me vil og har lyst.

Kva er grunnen til at folk bur i kommunar? Eller rettare sagt; bur folk i kommunar? Til ei viss grad gjer me nok det, somme av oss meir enn andre. Men mest av alt bur me på staden vår. Der ønskjer me at kommunen skal levera dei grunnleggjande tenestene. Som skule, legevakt og legeteneste, pleie og omsorg, behandling av byggjesøknader og utvikling av lokalsamfunnet. Samspelet går mellom dei folkevalde me vel, som også er innbyggjarar i same kommunen, og administrasjonen, som også er lokalt forankra med kontor på og kjennskap til staden.

Ein av dei viktigaste grunnane til  at folk røystar nei til større kommunar, er sjølvsagt mistanken om at det som er større ikkje nødvendigvis er betre. På fint heiter det profesjonalisering, men det like gjerne bety framandgjering.

I Suldal ønskjer verken politikarar eller innbyggjarar nokon kommunesamanslåing. Men det forhindrar ikkje at at sentraliseringa-og sentraliseringsforsøka av viktige kommune-tenester som brann og legevakt går sin gang her. Berre under ei finare overskrift.

Etter  at Sauda sette foten ned for legevakt i Ølen, kan den lokale legevakta igjen vera i spel etter at kommunestyret har gitt rådmannen grønt lys til å vurdera samarbeid på felt me kan ha nytte av, som det heiter i vedtaksformuleringa, signert Senterpartiet.

Samarbeid er eit vakkert ord, det nemner noko av det finaste me menneske får til. Då har dei sanneleg frekkheitens nådegåver om dei prøver å sentralisera vekk bjelkane i kommunen i samarbeidets namn, samtidig som hankar inn distriktspoeng på sitt samanslåingsnei.