Andrea  Hebnes  Tobekk  stiller  i  nynorsk-debatt

Andrea Hebnes Tobekk, frå Hebnes, er skuffa over lærarane på skulen som gjer det vanskeleg å vera nynorsk-elev. På torsdag stiller ho til debatt. Arkivfoto: Ole Jørgen Nøstbakken

Andrea Hebnes Tobekk stiller i nynorsk-debatt

Ho går første året på Jåtta vidaregåande skole på idrettsfag, og i kveld stiller ho til debatt i KåKå kverulantkatedralen, Sting Nere.

av Nora Bogevedt Jenssen

Med ingen ringare enn fylkesordføraren i Rogaland, ein lektor, ein dosent ved høgskulen og ein hovudtillitsvald i panelet.
– Jo, eg er kanskje litt nervøs, eg har jo ikkje gjort noko slikt som dette før.

Vanskeleg å vera nynorsk-elev
Grunnen til at ho engasjerer seg, er irritasjonen over kor vanskeleg det er å vera nynorsk-elev i Stavanger.
Heilt frå skuleåret starta i august har nynorsken vore til hinder, og ingenting er tilrettelagt.
– Kontaktlærar lova oss bøker på nynorsk før me begynte, men ved skulestart fekk me berre bøker på bokmål. Det tok ein månad før bøkene mine kom, og dei unnskylda seg med at det var elleve år sidan sist dei hadde hatt ein nynorsk-elev, sukkar Andrea.

Uvillige lærarar
Ho har opplevd lærarar som har prøvd å få henne over til bokmål, fordi dei sjølve synest nynorsk er vanskeleg. Og alle oppgåvene klassen får er på bokmål.
– Eg har sagt til lærarane at eg ikkje vel nynorsk for å vera vanskeleg. Nynorsk er målet mitt, og eg kjem aldri til å endra på det. Dessutan er det ein rett eg har, slår ho engasjert fast gjennom telefonen i matfriminuttet.
I tillegg til henne, er det berre ein annan elev, suldølen Siri Håranes Eide, som òg har nynorsk til hovudmål av alle dei som går idrett på skulen.

Mållaget
Problema ho har møtt på skulen, har gjort henne endå meir ivrig i målsaka.
– Ja, eg har meldt meg inn i mållaget for ikkje lenge sidan.
Ho trur ikkje det ho opplever er spesielt for Jåtta vidaregåande. Når ho snakkar med elevar som brukar nynorsk på andre skuler, har dei liknande opplevingar å komma med.
– Lærarane kan ikkje nynorsk, alle utanom norsklærarane snakkar nynorsk ned, fyrer ho laus og er superklar for kveldens debatt.