20 sommarspørsmål

Vigdis Gullberg er 69 år og bur på Suldalsosen. Ho har vore mykje på Stord i sommar, og i september blir det vandring i Italia med gode venner.

Nemn tre ting som får deg i sommarstemning
– Sol, bading og godt lag.

Kva vil du visa fram av Suldal til ein som er her for første gong?
– Det må bli gamle Osen og Stråpanuten, i tillegg til ein tur til Stranddalen og til Guggedals-stølane i heia. Me har så mykje flott å visa fram her i Suldal. I fjor hadde eg gjestar på gjennomreis med meg i rhododendron-hagen til Jakob og Ellen Roalkvam og i fjellhagen til Karl Lalid. Flotte stader!

Din favoritt-sommarmat?
– Eg lagar det ikkje så ofte lenger, men kald makrell med rømme og agurksalat. Det er sommar-mat for meg.

Føretrekkjer du fjord eller fjell om sommaren?
– Begge delar. Eg er oppvaksen ved sjøen på Stord, men etter 40 år i Suldal, er eg glad i fjellet også.

Beskriv deg sjølv med tre ord
– Omstendeleg. Mannen min seier at eg er skeptisk av natur, men eg veit nå ikkje, eg. Elles er eg veldig glad i barn og ungdom, eg likte jobben min som lærar veldig godt.

Sommar er høgsesong for festivalar. Kva festival ville du reist på om du fritt kunne velja?
– Det er jo ikkje akkurat ein festival, men Rosendal har mange kjekke kulturarrangement gjennom sommaren. Kunst og kultur i flotte omgjevnadar. Dit reiser eg ofte.

Eit sommarminne
– Utanfor barndomsheimen min på Stord, låg sjøen og ikkje langt ute Eldøyane, på rekkje og rad. Dit reiste me, foreldre og fem søsken, med båt om søndagane, bada og fiska krabbe. Det var barndomens paradis. Nå er det blitt industri-område der og eit tapt paradis.

Kor drøymer du om å reisa?
– Eg drøymer om India, der har eg vore for mange år sidan, men eg trur aldri det blir igjen. Berlin, derimot, der har eg vore mange gonger og drøymer alltid om å reisa tilbake. Det er kulturhovudstaden i Europa, ved sidan av London. Der er det alltid noko nytt å sjå.

Sommarlektyre?
– Det fine sommar-vêret har gjort sitt til at eg ikkje har lese like mykje som eg pleier. Men eg likar å lesa alt av skjønnlitteratur, gammalt som nytt. I lese-klubben hadde me nettopp eit kjekt gjensyn med Torborg Nedreaas. Ho var nabo med foreldra mine på Stord under krigen. Då ho hadde kåseri på radio, måtte me vera stille. Då var det heilt tyst i stova, og berre den sterke bergens-røysta til Nedreaas høyrtest frå radioen.

Din sommarsong nummer ein?
– Svantes lykkelige dag, kanskje?

Kva er for deg ein perfekt sommardag?
– Å få vera i strandkanten med barnebarna.

Finaste badeplassen i Suldal?
– Mosvatnet er flott. Veddal er flott på føremiddagen, og der kanoane til leirskulen ligg, er der flott i ettermiddags-sola. I år har eg til og med bada i Suldalsvatnet. Det var fjorten grader, men når det er varmt på land, går det greitt.

Dersom du fekk bestemma, kva er det første du ville ha gjort noko med i kommunen?
– Her må eg svara det same som dei fleste andre; Tunell i Rødsliane.

Kva er det mest impulsive du har gjort?
– Eg er overhovudet ikkje impulsiv! Det mest vågale eg har gjort, er nok då eg reiste aleine til Bonn på studietur til Goethe-instituttet. Eg var 60 år, var der i fire veker ein januar og budde privat. Der trefte eg folk frå heile Europa, og det blei ein nyttig og minnerik studie-tur.

Kva overskrift vil du helst sjå på framsida av avisa i sommar?
– Kulturen blømer i Suldal! Eg håpar me kan fortsetja med å vera ei kultur-bygd, sjølv om økonomien ikkje er like god som før.

Beste oppleving i Suldal?
– Det å få to barn og fire barnebarn. Me har gode oppvekstvilkår i Suldal.

Beste turtips i Suldal?
– Ein tur eg har gått mange gonger, er Skuteheia rundt. Om det er godt vêr, er det flott å bada i Svartavatnet.

Kva har du gjort i sommar?
– Eg har vore mykje på Stord og hjelpt ei eldre søster med å flytta. Ho skulle ut frå eit stort hus til eit lite hus ho har bygd i hagen sin. Å reinska eit heilt hus er mest uoverkommeleg. Det har gitt meg inspirasjon til å rydda heime hjå meg sjølv. Men i september blir det ferie, då skal eg vandra med Tiramisu-reiser i Italia i lag med gode venner.

Er det noko du ikkje likar med sommaren?
– Sniglane, men bank i bordet, dei har det heldigvis ikkje vore mange av i sommar. Vepsen likar eg heller ikkje.

Kven vil du gi ein blomebukett og kvifor?
– Eg ville vanlegvis sagt mannen min, for han er flink å hjelpa meg. Men eg har ei svigerinne, Gunvor Bakka, som er til kreftbehandling. Eg synest ho fortener ei blom for måten ho taklar sjukdomen på.