20 sommarspørsmål

20 sommarspørsmål

Karen Benninghoff, 37 år og bur på Sand. Så langt i sommar har det blitt ein Oslo-tur på Skeive dagar og fjellturar i Suldal. Før ferien er over, blir det også ein tur til Sommarland i Bø og kanskje ein Nord-Norge-tur.

av Marta-Brit Lunde

Nemn tre ting som får deg i sommarstemning
– Bading, sol og ferie!

Kva vil du visa fram av Suldal til ein som er her for første gong?
– Då ville eg tatt han eller ho med på ein lunsj hjå Brunsj, kjøpt Jelsa-jordbær og rusla gjennom Gata bortover til stranda i Nordenden.

Din favoritt-sommarmat
– Alt av sjømat, men hamburgar er også godt.

Føretrekkjer du fjord eller fjell om sommaren?
– Fjell, definitivt. Det er fjell eg er vaksen opp med.

Beskriv deg sjølv med tre ord
– Tja: Snill, kreativ og sporty. – Du er modig også, kjem det frå eitt av tantebarna.

Sommar er høgsesong for festivalar. Kva festival ville du reist på om du fritt kunne velja?
– Viss eg kunne vald, måtte det blitt Vinjerock i Jotunheimen. Eg har fleire år prøvd å få tak i billett, men dei blir selde på berre nokre minutt, rett etter dei blir lagde ut.

Eit sommarminne
– Det må bli frå ein fjelltur, som for eksempel sist tur som gjekk til Sellandsnuten då det var fullmåne. Me gjekk opp i sjutida på kvelden og slo opp telt litt nedanfor toppen. Klokka halv tolv gjekk me opp til topps og såg sola forsvinna og fullmånen gå opp. Ein kan laga mange gode sommarminne utan å måtta dra langt.

Kor drøymer du om å reisa?
– Eg kunne nok tenkt meg meir fritid som eg kunne brukt på fleire fjellturar, kanskje gå Norge på langs.

Sommarlektyre?
– Eg les ei tjukk bok: Historien om Spania av Herman Lindquist. Med alle sidene, vil eg tru at eg sikkert også kjem til å lesa den neste sommar også.

Din sommarsong nummer ein?
– Har ikkje ein song. Det blir vår- og sommarlista mi på Spotify.

Kva er for deg ein perfekt sommardag?
– Å vakna opp på stølen, Vasstølen. Ute er det sol og ein kan gå rett ut å bada. Og å vera i lag med ungane.

Finaste badeplassen i Suldal.
– Nordenden. Det er ikkje varmt der, men fint.

Dersom du fekk bestemma, kva er det første du ville ha gjort noko med i kommunen?
– Pussa opp i Nordenden, som å få opp ein utedo. Nå går jo ungane uti sjøen og tissar. Og gjerne eit banner der det står: Velkommen til Sand.

Kva er det mest impulsive du har gjort?
– Eg kjem ikkje på noko spesielt. Dottera Runa minner mor på siste impulskjøp. – Jo, i går var me og kjøpte åtte høner som me fann på nettet dagen før. Der me kjøpte hønene var det også ein hundekvalp til sals, som nesten blei med heim.

Kva overskrift vil du helst sjå på framsida av avisa i sommar?
– Rekordvarme i Suldal.

Beste oppleving i Suldal?
– Å veksa opp her på Sand.

Beste turtips i Suldal?
– Det må bli å gå frå Mosvatnet og til Vasstøl og så til Sand.

Kva skal du gjera i sommar?
– Det blir ein tur til Sommarland i Bø, masse fjellturar og kanskje ein tur til Nord-Norge på fleire fjellturar.

Er det noko du ikkje likar med sommaren?
– Kleggen.

Kven vil du gi ein blomebukett og kvifor?
– Til mor og far. Dei er fantastiske. Det er lettare å seia det i avisa enn direkte til dei.