20 sommarspørsmål

Glenn Søraas, 20 år og bur på Sand. Starta i ny jobb som assisterande butikksjef på Bunnpris i mai. Har jobba i heile sommar.

Nemn tre ting som får deg i sommarstemning
– Sol, ferie og å vera i lag med gode venner.

Kva vil du visa fram av Suldal til ein som er her for første gong?
– Mykje! Det er fint opp mot Blåsjø og Suldalsheiane. Og så ville eg tatt dei med på laksesafari. Det har eg prøvd nokre gonger og det er veldig tøft.

Din favoritt-sommarmat
– Det må bli hamburgar. Og det er det same om den er grilla eller steikt i panna. Det er ikkje så nøye.

Føretrekkjer du fjord eller fjell om sommaren?
– Fjord! Fordi me har hytta ved sjøen. Eg er glad i å vera på sjøen, anten det er fiske eller moro.

Beskriv deg sjølv med tre ord
– Dette er det verste eg veit. Spontan. Kan eg velja å skriva det tre gonger? Tja, kanskje positiv. Håpar nokon meiner det. Engasjert.

Sommar er høgsesong for festivalar. Kva festival ville du reist på om du fritt kunne velja?
– Det har vore dårleg med det i sommar. Men Palmesus i Kristiansand hadde vore kjekt å få med seg. Eg har aldri vore på den, men det hadde vore kult å reist dit.

Eit sommarminne
– Eg har ikkje eit spesielt. Men eg må seia alle somrane eg har vore på hytta på Bjoa. Å ha ferie, bada og fiska.

Kor drøymer du om å reisa?
– Eg kjem ikkje på noko spesielt. Likar meg best i Suldal eg. Jo, eg har vore ein gong i Lofoten. Eg drøymer om å reisa tilbake der. Der var det fint.

Sommarlektyre?
– Eg les ingenting. Jo, Suldalposten. Elles lite. E-postar på jobb blir det meir av.

Din sommarsong nummer ein?
– Nei, eg har ingen. Høyrer på det meste som listepop.

Kva er for deg ein perfekt sommardag?
– Å ha fri og helst på hytta. Å kunna stå på wakeboard, då koplar eg heilt av.

Finaste badeplassen i Suldal.
– Det er flott på Jelsa, men likar ein det varmt i vatnet er Gjåvatnet staden. Har vore mykje der i sommar, både i litle og store Gjåvatn.

Dersom du fekk bestemma, kva er det første du ville ha gjort noko med i kommunen?
– Tunell i Rødsliane, utan tvil.

Kva er det mest impulsive du har gjort?
– Det tør eg ikkje sei. Jo, i sommar såg eg ein reklame med fallskjermhopping. I løpet av den neste timen hadde eg og nokre venner bestilt fallskjermhopp. Dagen etter reiste me til Voss og hoppa. Og ja, det var verdt det.

Kva overskrift vil du helst sjå på framsida av avisa i sommar?
– Fleire flyttar til Suldal. Det treng me.

Beste oppleving i Suldal?
– Då seier eg som nokre andre her har sagt: Å veksa opp her.

Beste turtips i Suldal?
– Eg er inga fjellgeit. Eg har jo ikkje vore i Stranddalen, men eg vil tipsa om å ta turen der. Får eg tid, så skal eg dit.

Kva skal du gjera i sommar?
– Jobba. Eg har ikkje hatt ferie, men eg hadde litt ferie i påske då eg var i Thailand. Kanskje eg tar meg ferie til hausten. Ein tur til Tyskland for å køyra bil på bane.

Er det noko du ikkje likar med sommaren?
– Fluger. Det er ingenting som er verre. Og veps.

Kven vil du gi ein blomebukett og kvifor?
– Må bli mamma og pappa. Dei er altfor greie.