20 sommarspørsmål

20 sommarspørsmål

Lars Tobekk er 23 år og kjem frå Hebnes. I sommar jobbar han som pleieassistent på sjukeheimen på Sand, før han til hausten fortset IT-sikkerheit-studiet på fagskule i Stavanger.

av Mikkel Wigestrand

Nemn tre ting som får deg i sommarstemning
– Det må vera grilling, familie og ikkje minst festivalar!

Kva vil du visa fram av Suldal til ein som er her for første gong?
– Naturen i Suldal, absolutt. Her har me både skog, fjell og sjø tett på.

Din favoritt sommarmat?
– Grilla svinekjøt med nykokte poteter frå eigen gard og ein frisk salat.

Føretrekkjer du fjord eller fjell om sommaren?
– Det er jo fjorden eg har vakse opp med, sjølv om fjellet heller ikkje er langt unna. Heime på Hebnes har eg fiska frå eg var liten og likar godt sjøutsikta vår.

Beskriv deg sjølv med tre ord
– Hehe, det er ikkje mi sterkaste side å seia noko om meg sjølv. Men dei eg kjenner ville kanskje sagt at eg er positiv, smilande og omgjengeleg?

Sommaren er høgsesong for festivalar. Kva festival ville du reist på om du fritt kunne velja?
– Coachella-festivalen i California i USA. Det er eit enormt stort arrangement med varierte artistar. Eg likar veldig godt festivallivet!

Eit sommarminne
– Det må vera for to-tre år sidan då ein gjeng frå halvøya var på Sommarfestivalen og Rootsen i Vikedal to helger på rad. Det er ved sjøen, har god stemning og ein møter mange kjente. Der fekk eg gode opplevingar som ikkje lenger er så lette å realisera. Nå er dei fleste bundne til jobb i ferien.

Kor drøymer du om å reisa?
– Til den knøttlitle øya Bora Bora midt i Stillehavet. Det ser heilt sjukt ut! Der kan ein slappa av ved sjøen og kopla heilt ut.

Sommarlektyre?
– Nå er eg ingen lesehest, men eg les jo aviser, både på nett og papir. Då går det både i Suldalsposten og regionale aviser.

Din sommarsong nummer ein?
– Sommerkroppen av Mads Hansen. Det treng vel ikkje utdjupast?

Kva er for deg ein perfekt sommardag?
– Å sitja ved sjøen her på Hebnes og grilla med venner og familie. Der sit me gjerne til etter solnedgang. Eg har mykje slekt i hyttene her, så slike dagar blir det mange av.

Finaste badeplassen i Suldal?
– Grytevatnet. Det er einaste plassen eg badar, mest på grunn av varmen.

Dersom du fekk bestemma, kva er det første du ville ha gjort noko med i kommunen?
– Først å fremst å få fiksa Rødsliane. Den som er i dag, er dårleg. Men for å hiva meg på den meir lokale debatten på halvøya, kunne eg tenkt meg oppvekstsenter på Kjølvikstølen i staden for å vedlikehalda eit altfor stort bygg i Marvik.

Kva er det mest impulsive du har gjort?
– Er ingen impulsiv person, men hiv meg gjerne med på småting som å ta eit bad etter VM-kamp eller å dra med båten til Stavanger på fest «på minuttet».

Kva overskrift vil du helst sjå på framsida av avisa i sommar?
– Sommarvêret varer heile sommaren! Det er på tide at me får ein skikkeleg sommar, noko som ser bra ut så langt.

Beste oppleving i Suldal?
– Det må vera då me som 15-åringar drog på Dana Cup med Suldalsgutane. Me var ein samansveisa gjeng som hadde det veldig kjekt der nede.

Beste turtips i Suldal?
– Grytenuten. Går ein frå Østebø, via nuten og til Kjølvik blir det ein fin rundtur med variert turterreng og fin utsikt.

Kva skal du gjera i sommar?
– Eg skal jobba mykje på sjukeheimen, noko eg trivest veldig godt med. Utanom det skal eg på Country-festivalen i Seljord. I år er tredje året eg skal dit og det er noko eg gleder meg veldig til. Der skal eg leva festivallivet og treffa mange kjente frå kommunen.

Er det noko du ikkje likar med sommaren?

– Hm… Varmen? Nei, eg kan ikkje klaga på det fine vêret. Men det å få til sosiale ting er verre nå som alle har sommarjobbar. Ingen har ferie på likt, og gjengen er på mange måtar spreidde utover meir enn før. Det er jo litt dumt.

Kven vil du gi ein blomebukett og kvifor?
– Farmor. Ho er næraste nabo på Hebnes og stiller alltid opp når me treng noko.

Tekst og foto: Mikkel Wigestrand