20 sommarspørsmål

Karin Søndenaa Nessa er 59 år og bur på Jelsa. Når ho ikkje har sommarferie, er ho einingsleiar ved Jelsa oppvekstsenter. Ho ser fram til å få barnebarna på besøk. Elles blir det camping og stemne, i tillegg til turar til fjells.

Nemn tre ting som får deg i sommarstemning
– Sol, varme og ferie. Det å bestemma sjølv over dagane.

Kva vil du visa fram av Suldal til ein som er her for første gong?
– Det må bli ei vandring på strandstaden Jelsa, ein tur til Noresjøen og omvising i kyrkja, før ein båttur inn Økstrafjorden.

Din favoritt-sommarmat
– Det er så mykje som er godt, men grilla laks med ein god salat og omnsteikte poteter er min favoritt. Sjølvsagt med Jelsa-jordbær til dessert.

Føretrekkjer du fjord eller fjell om sommaren?
– Det blir litt vanskeleg. Begge delar er sommar for meg, både fjord og fjell.

Beskriv deg sjølv med tre ord
– Tenkjer eg har godt humør. I ei ordsky eg fekk frå personalet stod der; omsorgsfull og raus, så det kan eg jo ta med.

Sommar er høgsesong for festivalar. Kva festival ville du reist på om du fritt kunne velja?
– Har ikkje reist på så mange festivalar, har vore mest på kristne sommarstemne. I sommar skal eg på GF, generalforsamling for NLM, Norsk Luthersk misjonssamband, som skal vera mellom Sandefjord og Tønsberg. Det gler eg meg til. Der møter eg mange kjende.

Eit sommarminne
– Me budde jo lenge i Finnmark, ti år inst i Varangerfjorden. Ein sommar, etter ei fantastisk ferieveke på Senja, campa me på Kvenangsfjellet på veg heim. Eg og mannen i teltopninga, tre sovande ungar i teltet bak oss, og midnattsola som skein inn teltopninga der me sat, med utsikt over fjorden. Magisk!

Kor drøymer du om å reisa?
– Eg har aldri vore i Italia, så Roma drøymer eg om å reisa til. Kanskje når eg blir 60?

Sommarlektyre?
– Likar alltid å ha noko å lesa. Nå er eg nettopp ferdig med serien til Edvard Hoem, så eg må innom biblioteket igjen, snart.

Din sommarsong nummer ein?
– Har rett og slett ingen spesielle, men likar godt å høyre på kristen song og musikk.

Kva er for deg ein perfekt sommardag?
– Den startar med frukost på terrassen, før me går til sjøen og badar og avsluttar med fyr i bålpanna. Helst med heile familien rundt meg.

Finaste badeplassen i Suldal?
– Jelsavågen og Kuvikå.

Dersom du fekk bestemma, kva er det første du ville ha gjort noko med i kommunen?

– Vegane! Det at ungane våre ferdast på farlege vegar, er eit stort ansvar.

Kva er det mest impulsive du har gjort?
– Eg er nok ikkje så veldig impulsiv, men ein gong reiste eg frå Finnmark til Rogaland på sparket. Det var i januar, med tre ungar, og den minste var ikkje meir enn ein månad gammal.

Kva overskrift vil du helst sjå på framsida av avisa i sommar?
– Sol, varme og høge badetemperaturar heile sommaren!

Beste oppleving i Suldal?
– Det har vore så mange gode opplevingar i Suldal, men om eg tenkjer langt tilbake, må det bli då eg gifta meg med Lars i Jelsa-kyrkja for 37 år sidan.

Beste turtips i Suldal?
– Turen frå Bråtveit inn i Guggedalsheia til Dørlevatnet. Det har me stølar der eg skulle ønskt me kunne vore endå oftare.

Kva skal du gjera i sommar?
– Forutan å reise på GF, blir det camping-tur i Norge og Sverige, eg skal gå fleire fjellturar, i år står blant anna Dronningstien ilag med søster og svoger på programmet. Elles så gler eg meg til å ha barn og barnebarn på besøk.

Er det noko du ikkje likar med sommaren?
– Regn og kaldt vêr.

Kven vil du gi ein blomebukett og kvifor?
– Dei tilsette ved oppvekstsenteret på Jelsa