20 sommarspørsmål

20 sommarspørsmål

av Nora Bogetvedt Jenssen

Randi Strand Leirvik er 39 år og bur i Erfjord. Sommaren skal ho bruka på å førebu seg til ny jobb som lærar ved Erfjord skule, i tillegg til å testa ut campinglivet, lesa og bada.

Nemn tre ting som får deg i sommarstemning
– Det er lett! Markjordbær, måkeskrik og bølgjeskvulp.

Kva vil du visa fram av Suldal til ein som er her for første gong?
– Må jo bli Erfjord det, og alle dei flotte plassane me har her. Eg ville ha starta med Bogsfjorden.

Din favoritt-sommarmat
– Sommarsalat. Den må innehalda god salat, spekeskinke, jordbær, nektarin, litt god brie med ein dressing av olivenolje og balsamico, servert med nybakt foccaciabrød.

Føretrekkjer du fjord eller fjell om sommaren?
– Fjord, definitivt. Det har med oppveksten å gjera.

Beskriv deg sjølv med tre ord
– Det er ikkje så lett! Trur eg er ganske sympatisk. Kva var det eg hadde tenkt? Jo, sporty! Om det står i avisa, blir det vel sant? Og eg er smilande.

Sommar er høgsesong for festivalar. Kva festival ville du reist på, om du fritt kunne velja?
– Når du nemner festivalar frys eg på ryggen. Der er det siste eg kan tenkja meg. Ser skrekkeleg ut! Men kanskje Litteraturfestivalen i Lillehammer kunne vore noko for meg? Eg hadde nok ikkje fått med resten av familien på litteraturfestival, så om dei òg skulle vore med, måtte det blitt Tomatfestivalen på Finnøy.

Eit sommarminne
– Då treng eg ikkje reisa langt. I båt til Barkaneset, sjå sola gå ned og overnatta i båten.

Kor drøymer du om å reisa?
– Eg har alltid drøymt om å reisa til Australia. Vore på Bondi Beach og blitt redda av ein livreddar, det hadde vore noko det!

Sommarlektyre?
– Eg har litt forskjellige bøker som ligg og ventar. Akkurat nå les eg Javier Marias, KURSIVDet onde er begynt. Den blei kåra til årets bok då den kom ut i Spania. Elles blir det mykje fagstoff i sommar.

Din sommarsong nummer ein?
– Idyll med Postgirobygget.

Kva er for deg ein perfekt sommardag?
– Då vaknar eg tidleg om morgonen til strålande sol og startar med ein kajakktur i Bogsfjorden. Så drar eg til Habn med ungar og kjølebag, ja, eg slår eit slag for kjølebagen, den er undervurdert. Der er me heile dagen i godt lag. Når kvelden kjem, vil eg ut med båten, gjerne til Økstrafjorden å grilla litt. Helst i lag med gode venner.

Finaste badeplassen i Suldal?
– Habn.

Dersom du fekk bestemma, kva er det første du ville ha gjort noko med i kommunen?
– Då hadde eg starta med vegen mellom Erfjord og Sand.

Kva er det mest impulsive du har gjort?
– Før eg flyttA til Erfjord, då eg budde på Nag i Strand kommune, køyrde eg og nokre venner heilt til Lyngdal fram og tilbake same kveld, for der hadde dei så gode pita-brød.

Kva overskrift vil du helst sjå på framsida av avisa i sommar?
– Heitebølgje på veg!

Beste oppleving i Suldal?
– Når Bogsfjorden frys til is, og me kan gå på skeiser over heile fjorden. Det har det vore nokre vintrar, og det er heilt fantastisk!

Beste turtips i Suldal?
– Kjeppsnuten i Erfjord. Du går opp frå Træ, mellom Hålandsosen og Østerhus.

Kva skal du gjera i sommar?
– Me skal testa ut campinglivet og prøver oss med tur til Daftø, rett over grensa i Sverige. Elles skal eg lesa og bada mykje.

Er det noko du ikkje likar med sommaren?
– At den er så kort.

Kven vil du gi ein blomebukett og kvifor?
– Mor og far. Dei stiller alltid opp!